Resulta kan eleksyon kinundenar kan jovenes

May 23, 2019

 

Kinundenar kan Kabataan Party list asin iba pang organisasyon nin jovenes sa Camarines Sur an nangyaring resulta sa nagtapos na midterm elections na nagiging cuestionable sa sainda si dai man dapat mangganang senador iyo si nagluluwas sa birilingan sa National Board of Canvassers.


Si Mar Ampongan, lider kan Kabataan Party list sa provincia nagsabi na sinabotaje si resulta kan eleksyon arog kan nangyaring pagpalya kan mga vote counting machines (VCM) asin SD cards.


Duda sinda kun panong nanggana sa mga candidatong senador sinda Bong Go, Bato Dela Rosa asin Bong Revilla na dati nang hali sa prisohan huli sa casong plunder.


Dai sinda tubod na mauubos kan mga candidato kan administrasyon an doceng senador na premirong nangyari ini sa eleksyon na mayong nakalaog na oposisyon.


An grupo na naglansar nin indignation protest sa Plaza Rizal sa Ciudad nin Naga kasabay na sa iba pang ciudades na saindang pigdedenunciar sa publiko an nangyaring pangsasabotaje sa pirilian.


Saindang pigtutuyaw an Commission on Election (Comelec) sa pigmiminus sana kaining pagpalya kan VCMs na sa pinakahuring cuentada ninda sadit sana an labing 900.


Afuera pa kaini, segun pa sa lider kan Kabataan Party list igwang nagpalyar na labi sa on mil na SD cards.
Alagad sa records kan Departamento de Edukasyon (DepEd) nag-abot sa 1,333 casong pag-aberiya nin mga VCM hali sa sombong kan mga paratukdo na nagserbe bilang mga board of election inspectors sa nagtapos na midterm elections.


Maging an grupo kan Kontra Daya sa pangenot kan saindang convenor na si Professor Danilo Arao na nagsabi an nagtapos na pirilian kan Mayo 13 iyo na an ‘Worst election ever’’.


Enot nang sinabi kan Comelec na sadit sanang numero an pagkaraot kan 400 na VCM sagcod na nagsakat ini sa 600 na nagpalya.


Alagad an casong ini pigminus  sana kan Comelec. Segun ki Professor Arao dapat dai pagsabihon kan commission na sadit sanang bagay ini kumpara sa 85 mil na gumagana.


Mala ngani nag-abot sa 1,333 mga nag-aberiyang VCM asin 1,000 na SD cards.
 

Share on Facebook
Share on Twitter
Please reload