Stock nin NFA rice sa Bikol paubos na

May 23, 2019

Ciudad nin Legaspi – Paubos na an stock nin imported rice sa bodega kan opisina rehiyonal kan National Food Authority (NFA) kasunod kan pag-epekto kan Rice Tarrification Law (RTL) na inaprobaran ni Presidente Rodrigo Duterte kan Febrero 15, 2019.


Dai na nag-aangkat nin imported rice an NFA central office huli kan RTL matapos hubaan sinda nin regulatory power nganing tawan nin buelo an mga pribadong negosyanteng bagas na iyo na an mag-angkat nin bagas asin tinao na sa sainda kan gobierno an pagdistribuer nin bagas sa mga mercado nganing magbagsak an presyo.


Si Regional Manager Henry Tresteza kan NFA Bikol nagpahayag na sagcod na sana sa doce diyas an saindang 471 mil na sakong  stock nin bagas mantang aroaldaw an mga parukyano kan NFA rice nagkukonsumo nin 41 mil na sakong bagas.


Kun babasehan sa saindang regular na distribusyon nin bagas sa mga mercado dapat igwa sindang stock para sa kinse diyas alagad titikapohon na sinda mantang dai man sindang magiginibo huli ta mayo naman nag-aabot nin dugang na imported rice.


Sa ngonian naghuros naman an presyo kan commercial rice sa mga mercado hali sa dating 45 pesos igwa na sanang 35 pesos cada kilo asin an NFA rice mantenido sa P27.00.


Nag-epekto an implementing rules and regulation (IRR) kan RTL kan Abril 2019 asin kadakli kan mga opisina provincial nakahaman na kan saindang organizational plan sa mga empleados na ciertong mahahale sa serbisyo.


An trabajo nalang kan ahencia iyo an pagbakal nin paroy sa mga paraoma na iyo man an saindang sasarayon sa mga bodega bilang saindang food security encaso igwang calamidad.


An RTL tinawan buelo an mga negosyante alagad si paraoma an apektado huli ta nagparababa an presyo kan paroy cada kilo.       

Share on Facebook
Share on Twitter
Please reload