Cancer Center sa BMC magiging operational na

May 30, 2019

Marerealisar na an pinakapremirong Cancer Center sa rehiyon cinco na nakatalaan nang basbasan sa Lunes, Hunyo 10 sa laog kan bagong edificio kan Bicol Medical Center sa Ciudad nin Naga.


Bukas sa mga pasyente bako lang hale digdi sa Bikol envez maging hale sa Region V-A nganing dakul an matabangan na pobreng  mga pasyente na kaipuhan mapalawig pa an buhay.


Si Tommy Lee, kan Office of Presidential Adviser for Bicol Affairs (OPABA) asin consultant kan Presidential Anti Corruption Commission (PACC) nagpahayag sa Bicol Mail haros completo na an gabos na facilidades sa Cancer Center mantang nag-aandam na si BMC OIC Director Dr. Francisco Sales kan pigtalaan na blessing alagad naghahalat pa kan kumfirmasyon kan magiging bisita hali sa opisina central kan Departamento de Salud.


Si dating Juez asin ngonian Presidential Adviser for Bicol Affairs Marvel Clavecilla, nagsabi na saro sa saindang pigtatawan nin prioridad na maging operational na an tolong mga darakulang edificio kan BMC kabale na Cancer Center nganing matabangan an mga Bikolano asin dai na magpasiring pa sa Manila para dai na magastosan an pasyente.


An PACC asin OPABA saro sa pigmamawot na maging operational na an tolong mga bagong edificio nganing magamit na kan nagdadakul na mga pasyente aroaldaw.


Naheling mismo ninda an kamugtakan kan mga sursoksokan na pasyente kaya dapat magamit na an mga edificio nganing digdi na magpabulong an Bikolanong pasyente envez na magpasiring pa sa hospital sa Manila, sabi pa.


Afuera sa OPABA, si Congresista Gabby Bordado kan tercer distrito kan Camarines Sur naglalaoman na ma-aaprobaran na an saiyang House Bill No. 8276 nagdudugang kan bed capacity sa 1,500 hali sa dating 500 sana.


An bill ni Bordado sa BMC lusot na sa committee level naglalaom siya na antes matapos an 17th Congress maaprobaran nganing maging nang ley asin kabale na digdi iyo an dugang na fondo kan hospital. 


Sinabi kan congresista kabale na digdi iyo an upgrading kan mga service facilities, dugang na doctor, nurses asin iba pang mga medical equipment.


An HB No 8276  ‘’An Act increasing the bed capacity of Bicol Medical Center from 500 to 1,500 beds, upgrading the service facilities and professional health care therein, and upgrading funds therefor"(DPAureus)     
 

Share on Facebook
Share on Twitter
Please reload