Mga may anomaliyang infra proj sa Bicol documentado na

May 30, 2019

Nagkaperang mga proyecto sa infrastraktura sa Bikol na pig-implementar kan dating Department of Transportation and Communication (DOTC) na ngonian DOTr asin Department of Public Works and Highways (DPWH), documentodo na kan Presidential Anti Corruption Commission (PACC) an mga iregularidades kan mga patrabajo kan ahencia nganing isumiter sa Malacanan para sa magkakanigong aksyon.

 

An mga proyecto kinababalehan kan Sabang Fish Port asin Infirmary Hospital parejong sa Calabanga, Camarines Sur na pig-implementar kan administrasyon ni Presidente Aquino,  Albay Fish Port, trecientos metros na konkretong patinampo sa Sorsogon asin iba pang proyecto sa infrastraktura na nakatalaan ibuyagyag sa ipapaapod na press conference.


Kaayon sa may sisimbagon iyo an mga kontraktor na grabe na an abalang patrabajo asin ini makaka-apektar sa Build-Build-Build program ni Presidente Rodrigo Duterte.


Ini an kinumfirmar sa Bicol Mail ni Tommy Lee kan opisina rehiyonal kan PACC mantang igwa na sindang hinaman na rekomendasyon na nakatalaan darahon sa Malacañan sagcod na imbestigaran an  mga envueltong kontraktor asin opisyal kan ahencia. 


Sa enot na mga patanid ni PACC Chairman Dante Jimenez, sinabi kaini na mayo sindang sasantuhon na opisyal  kan arin man na ahencia de gobierno kun envuelto sa ano man na anomaliya, maatubang sinda nin magkakanigong caso sa jusgado.


Digdi sa Camarines Sur liwat pigpahayag kan PACC an cuestionableng proyecto kan Sabang Fish Port sa Calabanga, Camarines Sur na pigconstruhir kan nakaaging administrasyon ni Presidente Aquino apesar na mayong mayor’s permit.


An Fish port pig-implementar kan dating DOTC sa paagi ka Philippine Fisheries Development Authority alagad sa ginibong inspeksyon kan nakaaging taon kan mga personajes kan PACC asin Office of Presidential Adviser for Bicol Affairs, nag-gagaba na an seawall na delicado sa aksidente.


Sinabi ni Lee, saindang pighuhurot na dapat pakarhayon liwat kan kontratista an proyecto nganing mapakinabangan na asin maging operational.


An ice plant kan fish port nagagamit na kasunod kan ginibong espuersos ni Usec Marvel Clavecilla asin naging operational puon kan nakaaging taon 2018.


Sa isyu sa edificio kan Infirmary Hospital pig-andaman na ini  na maging operational sa pagtarabangan kan DOH, LGU Camarines Sur, Congresista Gabby Bordado asin ni Bise Presidente Leni Robredo nganing maging operational alagad dai nadagos huli sa politica mala ngani igwa nang mga medical equipment dai inako kan Capitolyo Provincial.


An dahilan kan Capitolyo, pig-iimbestigaran pa kan PACC an patrabajo kan hospital na namumugtak sa Brgy. Paolbo.


Sa isyu sa Albay Fishing Port, saro ini sa saindang pig-imbestigaran na naggagaba naman an seawall.


Sa Sorsogon, sinabi pa kan PACC Bikol sarong konkretong tulay digdi na pigtinampohan nin 300 metros alagad amay nang nagkararaot.


Pinapaapod na ninda si OIC District Engr. Willy Florin kan DPWH alagad dai man nagsipot si kontraktor nganing magpaliwanag asin igwa siyang sisimbagon. (dpa)
 

Share on Facebook
Share on Twitter
Please reload