P7.5M shabu nakumfiscar sa Cam Sur
Maabot sa otso milyones peso an nakumfiscar kan Philippine Drug Enforcement Agency (PDEA) Bicol PNP, asin Naga City Police office na ilegal na droga sa magkasuhay na drug operations sa Ciudad nin Naga asin Camarines Sur kan nakaaging Juevez asin Viernes, Mayo 23 asin 24.
Sa operasyon kan PDEA, Naga City Police Office (NCPO) asin kan Bikol PNP mga alas 10:30 nin aga, Mayo 23 sa barangay Tabuco, Ciudad nin Naga saindang natalikop an magtugang na Edgar Majencar Jr. y Batungbakal na midmid sa alias na Bogs, 26 años, soltero na nagtatrabajo sa call center asin Sean Edward Majencar y Batungbakal, 25 años, soltero asin mayong trabajo.
Si P/Sgt. Tobias Bongon, opisyal na parataram kan NCPO nagsabi nakumfiscar kan mga operatiba sa duwang suspechado an shabu namay market value nin P4,080,000.00 sa ginibong buy-bust operation na pinangenotan kan PDEA asin PNP.
Sa imbestigasyon kan PNP asin PDEA an ilegal na droga pig-aangkat pa hale sa National Capital Region (NCR) alagad dai naman pigdetalye kun sain na particular na lugar mientras na igwa pang ginigibong follow-up operations.
Sinabi pa an ama kan magtugang, enot naman nadakop kan mga awtoridad huli sa caso sa droga.
Sunod-sunod an acomplisimiento kan NCPO sa campanya sa ilegal na droga asin dai palang nahahaloy nakarecibe sinda nin komendasyon hali sa City Hall.
Sunod na aldaw sa ginibong buy-bust operation sa Barangay Tara, Sipocot, Camarines Sur nakakumfiscar an mga awtoridad nin duwang plastic bags na may gabat nin 500 gramos nin shabu asin ini nagcacantiddad nin P3.4 milyon.
An nadakop na suspechado pigmidbid na si Ferdinand Luzarada y Galang, dati nang nasa listahan na envuelto sa operasyon sa ilegal na droga sa Sipocot asin pigsusuplay pa sa Ciudad nin Naga, Camarines Sur asin Camarines Norte.
Si Luzarada, dati nang nalaom sa preso nin sarong taon asin anom na bulan sa Provincial Jail sa Camarines Norte huli sa sa caso sa ilegal na droga.
Padagos pa an ginigibong imbestigasyon kan PDEA ki Luzarada sa posibleng iba pang kasabuat kaini sa droga sa Naga asin kabale pa sa pigbabagsakan iyo an Rinconada area.
An mga nagkadarakop anas nang nag-aatubang nin caso sa pagbalga sa Acta Republica 9165 o mas midbid sa Comprehensive Dangerous Drugs Act of 2002.
LIWAT NAKAKUMFISCAR P400 MIL NA SHABU
Sa liwat na drug operations kan NCPO, PDEA asin Bicol PNP nakakumfiscar naman nin maabot sa cantidad P400 mil na shabu sa ginibong search warrant mga alas 10:00 nin aga kan Martes, Mayo 28 sa duwang suspechado na sinda Cristine Avila Samonte asin Austria Hilario sa San Alfonso Subdivision, Pacol, Ciudad nin Naga.
Sa suway na operasyon mga alas 3:00 nin hapon sa sarong hotel sa M.T. Villanueva Avenue nadakop sinda Danica Francisca, 39, asin Joselito Morano, 31. Nakumfiscar sa sainda an sampulong plastic shace nin shabu na tolos man sinangatan sinda nin mga caso sa pagbalga kan RA 9165.