Dr. Albeus matindog na fiscalizer sa consejo

June 5, 2019

Si Dr. Jess Albeus, solamenteng ganador na consejal sa Ciudad nin Naga na hale sa oposisyon nag-asegurar sa 34,945 mga nagboto sa saiya kan nakaaging midterm elections na matindog  siya sa Sanggunian Panlungsod bilang fiscalizer alagad kun an resolucion asin ordinansa para sa karahayan kan ciudad nagcierto na ini saiyang susuportaran.


Pera nang decada an ‘’ubos kun ubos gabos kun gabos’’ sa ciudad ngonian sanang eleksyon an mga electorado kan ciudad nagdesisyon na magboto nin dawa sarong consejal na bakong hali sa Team Naga nganing magkaigwa nin fiscalizer sa  consejo kan ciudad.


Nag-ika sampulo siyang puesto sa mga napiling consejal, alagad nagpahayag nin pasasalamat ki Premira dama Farah Bongat huli kan suporta sa saiya kan nakaaging eleksyon sagcod na nakalaog siya sa ‘’magic ten’’.


Pinahayag sa media ni Mrs. Bongat na saiyang sinuportaran si Albeus huli ta dawa bakong panahon nin eleksyon padagos an saiyang serbisyo sa comunidad bilang sarong doktor.


Nagtutubod an bagong matukaw na consejal na binutohan siya nganing magreparo kun igwang nangyayaring iregularidad sa  City  Hall na dapat niyang mabantayan alagad bako man sa gabos envez kun ikakarahay an ano man na proyecto o programa nagcierto na saiyang susuportaran.


‘’Kun kaipuhan magtaram contra sa polisiya kan Naga alagad kun nasa tama an dalagan kita po matabang nganing maging progresibo an satuyang ciudad. Dai man gustong sabihon  pag-fiscalizer permi  na sanang contra’’


‘’Magiging akong team player pagmarhay na programa alagad pagmaheling tang kaipuhan magcontra gigibohon ta para sa interes kan mga taga Ciudad nin Naga’’.


Saiyang sinabi na kan gibohon si proklamasyon sa sainda kan City Board of Canvassers, saiyang nakaulay si Mayor elect Nelson Legacion na masuporta siya sa liderato kan bagong jefe ejecutivo kan ciudad.


Si Albeus, pang apat nang veces na nagcandidatong consejal asin ngonian sana nanggana na iyo an nagtapos kan ‘’ubos kun ubos gabos kun gabos’’ na pigpunan kan panahon ni dipuntong Alcalde Jesse M. Robredo.


Sinabi man ninda Vice Mayor elect Nene de Asis asin Consejal Vidal Castillo na mayo man nin problema kun igwa nang oposisyon sa SP huli ta dawa an saindang grupo sa ngonian anas TN entero man pigdedebatehan an pigpapandahan an mga resolucion maging ordinansa.   


Segun pa sa bise alcalde dawa bakong miembro kan TN si Albeus tatawan ninda nin committee chairmanship depende sa pag-uurolay kun ano an saiyang kakapotan na komite.  (dpa)   

Share on Facebook
Share on Twitter
Please reload