LGU Legazpi, orgullo kan DENR namay SLF

June 5, 2019

Labi nang sarong decada an Acta Republikca 9003 na mas midbid sa Ecological Solid Waste Management Act of 2002 alagad digdi sa Bikol unikong an lokal na gobierno kan Ciudad nin Legazpi iyo sana an igwang Sanitary Land fill (SLF).


An piglalaoman na masunod iyo an Ciudad nin Naga na pigtalaan maging operational na an SLF sa barangay San Isidro antes magtapos an bulan nin Hunyo, sa ultimong termino kan paluwason na Alcalde John Bongat.


Si  Grace Cariño, PENRO Officer sa Camarines Sur asin mga CENRO Officer nagpahayag kaini sa press conference kasuodma (Hunyo 5) sa pagsikad kan saindang actividades para sa Philippine Environment Month na an saindang tema iyo an ‘’Beat Air Pollution’’.


Nagkapera nang mga LGUs an pinatanidan kan DENR mala ngani igwa nang sinangatan nin caso nin opisyales lokal sa Albay.


Sinabi pa ni Cariño sa saindang ginigibong pag-monitor kan open dumpsite sa barangay Balatas, Ciudad nin Naga tinahubanan na an setente por ciento asin natatadang treinta por ciento iyo na sana an pigbabagsakan kan mga nakokolektang basura aroaldaw mientras na pighahalat na maging operational an SLF sa brgy. San Isidro.


An National Commission on Solid Waste sa paagi kan DENR-EMB nagtaong fundo sa City Hall para sa total closure kan dumpsite.


An aviso kan DENR sa mga LGUs na mayong SLF dapat maghagad nin tabang sa kataid na LGU nganining tugotan sinda na mag-apon nin basura alagad defende sa saindang mga kondisyones.


Pigbuyagyag pa sa press conference na digdi sa Camarines Sur 49 por ciento kan mga LGUs nag-iimplementar kan segregated collection, 46 por ciento nakabugtak na kan saindang material recovery facilities, 38 por ciento sa operation of solid waste disposal facilities, igwa pang onse por ciento na may operasyon kan control dump facility, nasa 35 por ciento pa an operation dumpsite asin 16 por ciento mayong disposal facilities.


Sinabi pa kan PENRO CamSur na an Proclamation No. 237 nagdedeclara na an cada bulan nin Hunyo kan taon iyo an Philippine Environment Month.  (dpa)

Share on Facebook
Share on Twitter
Please reload