Libreng ukay-ukay sa NCCS 1

June 5, 2019

Nagtataong libreng oniporme an Naga City Central School 1 sa mga nag-eescuela digdi na tinitikapo an mga magurang nin pambakal  kan  mga gamit kan saindang estudiante nganing makatapos sana sa pag-adal.


Si  Leo Damasig, Principal kan NCCS 1 nagpahayag sa Bicol Mail  dakulang bagay an pigdodonar kan mga naggagraduar sa elementarya digdi perang taon na asin narealisar ini sa paagi kan Parent Teachers Association (PTA) na nagkasurondo na idonar na kan saindang mga magraduar na estudiante an ginamit na oniporme nganing mapakinabangan pa.


Sa burokasan pa sanang klase  kan Hunyo 3 nagkapera nang mga magurang na tikapo sa cuarta an nagpila nganing mag-ukay ukay asin nagpahayag nin pasasalamat sa escuelahan asin PTA.


Sinabi pa kan principal na magpapadagos an programang ini kan PTA kan saindang escuelahan nganing makatabang sa mga magurang na nagkukulang an saindang cuarta para sa pambakal nin gamit sa escuelahan.


Afuera pa kaini, taon-taon an saindang Alumni Association nagdodonar nin mga school supplies na prioridad si mga pobreng familia. (dpa)

Share on Facebook
Share on Twitter
Please reload