Muslim Community nangangadie mapunan na an rehab sa Marawi

June 5, 2019

Nagtapos an selebrasyon kan Fid’l Fitr’, sarong dakulang Islam Festival, na nagtapos kan Ramadam, an Muslim Community sa Ciudad nin Naga namumundo na inabot na nin duwang taon dai pa napuponan an rehabilitasyon sa Ciudad nin Marawi.


Si Mike Mustapa, Presidente kan Maranao Guild and Solidarity sa Ciudad nin Naga nagpahayag sa Bicol Mail na kasuodmang Hunyo 5 na iyo an Fid’l Fitr’ saindang pigpapangadie sa Dios na mapunan na kan gobierno an rehabilitasyon kan Marawi matapos ideklarang ‘’liberated’’ kan Oktubre 17, 2017 alagad sa ngonian dai pa nahehelingan nin pagbabago.


Saindang hinahagad sa mga lideres kan Ciudad nin Marawi asin ki Presidente Rodrigo Duterte na punan na an rehabilitasyon mantang duwang taon na an nakakaagi an Marawi siege dai pa giraray narerealisar an pangako kan mga lideres lokal asin nasyonal.


Si Mustapa, na tubong Marawi nagsabi pa na an saindang ciudad asensadong lugar sa Mindanao kan dai pa nangyayari an krisis na nagpuon kan Mayo 3, 2017 kan an Isis Maute group asin Abu-sayyaf nag-atake ngani sanang sakupon an lugar na ini.


Sa kaparejong aldaw si Duterte tolos nagdeclara nin martial law, inabot nin limang bulan an giyera na grabe si destroso sa negosyo asin rinibong mga residentes an apektado asin sinda digdi sa Ciudad nin Naga nagpapangadie na ‘’sana’’ mapunan na an mga proyecto sa saindang ciudad.


Si labi sa sangatos na evacuees sa Ciudad nin Naga mayoria nagbalik na sa Mindanao asin tolo na sanang familia an nawalat digdi sa pagtubod na tapos na  an giyera makakapuon na sinda sa pagbalik sa normal na pagbuhay alagad sagcod sa ngonian nakatiwang-wang an pangako kan gobierno, sabi pa ni Mustapa.


Pigdeclarang ‘’liberated’’ an ciudad kan Oktubre 17, 2017 matapos magadan sa giyera an terror group’s leader Abu Sayyaf Sublodin Isnilon Hapilon asin Maute group leader Omar Maute.


Pigselebrar ngonian na taon an enot na anibersaryo kan liberation sa Marawi hale sa teroristang grupo alagad naglalaom an Muslim Community sa Naga na sa sunod na taon dapat igwa naman nin mahelingan na pagbabago sa pag-implementar kan rehabilitasyon, sabi pa. 
                                (dpa)

Share on Facebook
Share on Twitter
Please reload