13 gadan sa naglitong-litong na truck
AKSIDENTE SA TAGPOCOL. Retrato kua kan San Fernando Municipal Police Station, San Fernando, Camarines Sur maheheling an pasajeros kan truck na nakaarapon sa tinampo.
Treceng personas an binawian nin buhay, kabale an 16 años na daragita na nag-aandam na kan saiyang pagpakasal sa 19 años na nobyo mientras na 41 pang iba an iredo kan maglitong-litong nin perang veces an saindang piglulunadan na truck sa barangay Tagpocol, San Fernando, Camarines Sur.
Kabale sa mga biktima an mga sadiring tawo kan kakasalon na daragita na si Bea Locilo asin sa lado kan kaglalake.
Masuerte na nakasalbar sa trahedya iyo an nobyo na si Wilmer Pelaez, na nagpawalat sa saindang residencia.
An aksidente nangyari kan Sabadong hapon, Hunyo 8 matapos magpresentar si Pelaez sa saiyang papakasalan na si Locilo na kabale sa nagrulonad sa foton truck na nag-agi sa bukid na lugar kan barangay.
Sa osipon ni Salve Pelaez, 30 años asin tulong bulan na bados, tugang kan nobyo nangyari an aksidente sa pabulasok na tinampo asin nasisibot an chofer kan truck na si Mario Jacobo, 46, kun ano an saiyang gigibohon sa marikas na padalagan pahuros sa tinampo sagcod na dagos nang nagbaralintong nin nagkaperang veces na naka-apon sa tinampo si mga pasajeros asin naka-untog man an saiyang payo.
Sa imbestigasyon kan San Fernando Municipal Police Station, sinabi na nawaran nin kontrol an truck na iyo an naging causa kan trahedya.
An truck sadiri kan LGU San Fernando alagad an chofer na si Jacobo, bakong empleado kan munisipyo envez barangay kagawad kan Barangay Alianza.
Sinabi pa kan PNP an truck mabuelta pa sa barangay nganing sundoon giraray si mga winalat na pasajeros alagad dai na nangyari matapos kan trahedya.
Si Salve na kabale sa mga survivor nagsabi suroksokan sinda sa truck mala ngani pito sindang nakatukaw sa kataid kan chofer.
Lima an tolos binawian buhay sa lugar kan aksidente asin si iba nagadan mantang pigbubulong sa Bicol Medical Center.
Si M/Sgt. Victor Quilao, kan Municipal Police Station kan San Fernando nagsabi na an mga biktima hale sa Barangay Pinamasagan matapos kan seremonya sa pagpresentar kan lalaki sa saiyang magiging nobya. Kan pabuelta na sa brgy. San Joaquin, an lugar kan babae, an vehiculo nagkaigwa nin problema sa makina mantang nagdadalagan sa pahuros na tinampo kan Brgy. Tagpocol mga bandang alas 5:30 nin hapon, Hunyo 8.
An mga biktima pigbisto na sinda Bea Locilo, Ceciliano Hinda, Ramil Serrano, Marvin Chavez, Monalita Reyman, Edcel Regodon, Agnes Farol, Aileen Pelaez, Ramona Pelaez, Pedro Pelaez, Mark Pelaez asin Sherwin Mendoza. An anom sa sainda mga menor de edad, sabi pa sa report kan PNP.
An mga na-iredong pasyente pigdalagan sa BMC sa Ciudad nin Naga.