Gagabaon na edificio ginamit na classroom

June 13, 2019

Ipapagaba na sana alagad napiritan ipagamit sa mga estudiantes an sarong loma nang edificio kan Camarines Sur National High School (CSNHS) sa Peñafrancia Ave., Ciudad nin Naga nganing sanang makapuon tolos sa premirong aldaw nin burokasan nin klase mantang igwa man kutang bagong duwang edificio nagsayuma pang i-turn over sa escuelahan kan DPWH.


Ini an naging solusyon ni Principal Sulpicio Alferez III mantang inabot nang 11,600 an saindang populasyon sa segundarya ngonian na school year 2019-2020 mala ngani an saindang ratio sa classroom sarong paratukdo asin 50 hasta 60 estudiantes.


An CSNHS igwang extension sa M.T. Villanueva Ave. na bagong natapos na duwang edificio na may 48 classroom alagad dai pinagamit muna kan DPWH 3rd Engineering District sa premirong aldaw nin burokasan nin klase huli ta igwang mga porsyon kan edificio an kaipuhan pang mapakarhay kan kontratista antes ipa-okupar sa mga estudiantes.


Alagad sa pinadarang surat ni District Engr. Rebeca Roces, pigpahayag na sainda nang ipapasa an duwang edificio sa CSNHS sa maabot na Hunyo 15 asin piglalaoman na magagamit na kan rinibong mga estudiantes sa Hunyo 17, sabi pa kan principal.


Maabot na sa sangatos an classroom sa M.T. Villanueva na pig-ookupar kan maabot sa 5,600 na estudiantes. An solusyon sa halangkaw na populasyon  digdi iyo an pagkaigwa nin duwang ‘’shifting’’  nin klase nganing makahusto sana sinda sa mga classroom.


Sa listahan kan CSNHS maabot sa cincuenta por ciento kan mga enrollees digdi hali sa pagtaraid na banwaana kan Ciudad nin Naga.


Huli kan namimidbid na marhay na an calidad kan edukasyon digdi padagos na naglalangkaw an enrollees sa escuelahan taon-taon.


Mismo an mga magurang iyo an nagsasabi kaya pigbalyo ninda an saindang estudiantes digdi huli kan calidad na sa ngaran na edukasyon.
 

Share on Facebook
Share on Twitter
Please reload