Problema sa pagpatukdok SLF, hinahanapan solusyon kan CENRO

June 13, 2019

Nagkaperang mga lokal na gobierno sa Camarines Sur an mayong kakayahan na maimplementar an ma-duwang decadang Acta Republica 9003 na mas midbid sa apod na Ecological Solid Waste Management Act of 2002 huli sa kawaran ninda nin fondo.


An solusyon kaini, mag-negociar o magkaigwa sinda nin clustering sa kataid na LGU na igwang kakayahan nganing mag-establiser kan Sanitary Land Fill (SLF), sabi ni CENRO Eduardo Ampongan na may base sa Sipocot, Camarines Sur.


 Saiyang pighalimbawa an mga banwaan kan Camaligan asin Cabusao, Camarines Sur na sakop kan saindang CENRO Office na parejong nag-ako nadidificilan sinda na magka-establiser nin sadiring SLF mantang kulang an saindang fondo asin mayo pang lugar.


Alagad sa lado kan LGU Cabusao na nagdeclara nang imposibleng marealisar digdi an SLF huli ta an lugar na ini yaon na gayo sa bunganga kan Bicol River asin hababaon pa an lugar na ini kaya haros mayong matutukdokan kan proyecto na pigmamando kan RA 9003.


An aviso kan CENRO Office makipag-negociar na sa saindang kataid na banwaan nin Sipocot na igwa nang lugar na tutukdokan kan SLF asin napag-araman ni Ampongan na harani nang marealisar an negosasyon kan duwang LGUs.


Sa lado kan LGU Camaligan, igwa nang enot na ginibong negosasyon sa LGU kan City Hall sa presenting liderato ni Alcalde John Bongat alagad maagi pa an proceso sa masunod na composisyon kan Sangguniang Panlungsod sa pamamayo ni Bise Alcalde Nene De Asis, presiding officer.


An Ciudad nin Naga magkakaigwa na nin sadiring SLF sa barangay San Isidro na nakatalaan maging operational sa huring semana kan Hunyo 2019 na mawot kan LGUs kan Canaman asin Camaligan digdi na magbagsak kan saindang basura na magdedefende sa saindang kondisyones.


Sa pag-monitor kan Department of Environment and Natural Resources (DENR) sa Camarines Sur bako lang an Cabusao asin Camaligan an parejong may problema envez igwa pang dakul na LGUs.
An DENR iyo an nagtataong technical assistance sa mga iimplementar na SLF.


Sa ngonian igwa pang treinta y cinco por ciento nin mga LGUs na nagpapadagos pa kan saindang dumpsite asin onse por ciento nagpapadagos pa kan operasyon kan control dumpsite,  cuarenta y nieve nag-iimplementar na kan segregated collection asin 49 por ciento igwa nang material recovery facilities (MRF).

 

Digdi sa Bikol, solamente an LGU sa Ciudad nin Legazpi an naka-establiser kan proyecto asin sa dai mahahaloy magiging operational na sa Ciudad nin Naga. (dpa)

Share on Facebook
Share on Twitter
Please reload