Liquidation squad kan gobierno vs aktibista

June 20, 2019

Legislative inquiry hagad sa congreso

 

PROTESTA LABAN SA TIRANIYA. Ribo-ribong mga progresibong grupo sa Bikol naka t-shirt nin kolor pula naghapit sa Plaza Orgaon kan Ciudad nin Naga nganing saindang kundinaron an mga pang-gagadan sa saindang mga par-iribang human rights defender.                                                                    (BAYAN CSUR)

 

 

Nagtutubod an Bayan Muna na igwa nang grupo nin liquidation squad an estado nganing likidaron an mga progresibong grupo mala ngani igwa naman nin tolong human rights defenders sa Bicol an pinagbabadil gadan sa laog sana nin sarong semana.

 

Kun igwang liquidation squad  an PNP sa giyera contra droga, igwa naman liquidation squad an ahente kan estado o buot sabihon miembros kan militar.


Ini an mga pahayag sa entrevista kan Bicol Mail ni Bayan Muna Party list Representative Carlo Isagani  Zarate  na presente sa ginibong dakulang protest rally sa Plaza Rizal kan Ciudad nin Naga kasoodma na pigparticiparan kan mga progresibong grupo hali sa mga provincias kan Kabikolan.


Namumundo si Zarate sa nangyayari sa presenteng administrasyon huli kan padagos na mga  extra  judicial killing na biktima an mga nagsusurog sa kasaraditan.


Sa protest rally, saindang kinukundenar an sunod-sunod na mga extra judicial killing na an envuelto iyo an bagong organisaron na Liquidation Squad kan estado.


Saindang pigdenunciar an pambabadil gadan sa tolong mga progresibong grupo na kinababalihan ninda Ryan Hubilla, 22,  asin Nelly Bagasala, 69, sa Ciudad nin Sorsogon asin Neptali Morada, 45, sa barangay San Isidro, Ciudad nin Naga.


Si Morada, segun sa saiyang tugang na si Delia binisita kan nagpapabistong nasa intelligence division kan 9th ID kan Phil. Army na magpirma sa sarong papeles na siya sarong surenderee alagad nagsayuma.


Dinagdag pa ni Zarate na nasunad sinda nin resolucion sa congreso nganing magconducir nin legislative inquiry sa sunod-sunod na paglilikidar sa mga progresibong grupo. 


An familia kan biktima asin progresibong grupo nagkukurahaw nin justicia asin hagad man ninda na suportaran an resolucion ni Zarate nganing magconducir nin legislative inquiry sa congreso.


   Sa lado man kan militar, si Col. Paul Regencia opisyal na parataram kan 9th Infantry Division kan Philippine Army sa Bicol na may base sa Camp Elias Angeles, Pili, Camarines Sur nagpahayag sa media na mayong katutuanan an mga akusasyon na ini kan militanteng grupo huli ta mayong basehan.


‘’Turo agad, ready na an mga press release kahit walang imbestigasyon’’ Kun dati nagigibo sinda nin fact finding mission ano ta dai muna ginibo, sabi pa ni Regencia.


Segun pa sa opisyal na saindang iimbestigaran an pigsasabing miembro kan intelligence division kan 9th ID.
Si Nelsy Rodriguez lider kan Bayan Muna sa Camarines Sur nagtutubod na igwa nang Liquidation Squad an estado na nasa likod kan mga pambabadil sa sa saindang pag-iriba.


An insidente nangyayari kasunod kan pinaluwas na Memorandum Order Number 32 kan Malacañan.


An sunod-sunod na human rights violations sa rehiyon, saro nang evidencia na an state forces sa irarum kan gobierno ni Duterte nagpuon na kan saindang misyon sa pan-aatake sa mga aktibista sa Bicol sa paagi kan Memorandum Order 32, sabi pa ni Rodriguez.


Sa pinaluwas na orden ni Executive Secretary Salvador Medialdea an direktiva kan nakaaging taon 2018 para labanan an inaapod nindang ‘’lawless violence’’ asin ‘’act of terror’’ particularmente sa mga provincias kan Samar, Negros Oriental, Negros Occidental asin Kabikolan nganing mapugolan an paglala kaini sa iba pang rehiyon.


Saindang pikbiklad an serye nin mga pang-gagadan sa Bicol. Segun sa Bayan Muna, si Morada ika-64 nang biktima kan mga extra judicial killing sa rehiyon mantang sinda Hubilla asin Bagasala naman ika-apat asin ika-limang biktima kan EJK sa provincia nin Sorsogon ngonian sanang taon.


Sa taon na ini, ginadan man sinda Prieto Diaz asin Dennis Españo kan Abril 29 sa Bulusan, Sorsogon, Nicasio Elbio kan Hunyo 11 sa Brgy. Bato, Bacon, Ciudad nin Sorsogon  asin si Herminigildo Domdom kan Hunyo 12 sa Brgy. San Isidro. An tolo anas miembros kan Anakpawis party list asin an mga responsable sa krimen dai pa nabibisto mientras na mayo man nangyayari sa imbestigasyion kan PNP.
                                       (dpa)

Share on Facebook
Share on Twitter
Please reload