NPA bako nang homa sa seguridad

June 20, 2019

Pili, Camarines Sur – Kun sa sangatos, saes (6) por ciento nalang an miembros kan rebeldeng New People’s Army sa Bicol mantang padagos na nagluluya an organisasyon asin considerado na bako nang homa sa seguridad sa rehiyon.


Mala ngani kun nakikipag-sagupa sinda sa tropa kan militar kulang na sa sampulong armadong NPA nag-iiribanan.


Si Col. Paul Regencia, opisyal na parataram kan 9th Infantry Division kan Philippine Army sa Bicol na may base sa Camp Elias Angeles, barangay San Jose, Pili, Camarines Sur nagpahayag na dawa kulang na  an fuersa kan mga rebelde alagad padagos an saindang security operation.


Dakul na sa sainda nagsuroko na kan saindang armas sa pagtubod ninda na mayong futuro an saindang kaabtan kun magpapadagos sa pakikipag-giyera sa tropa kan gobierno.


Antes kan eleksyon kan Mayo 13, 2019 nagkaperang mga insidente nin encuentro sa Camarines Sur asin Sorsogon na an saindang misyon nganing magpaheling kan saindang fuersa na buhay pa nganing maka-colecta nin permit to campaign asin permit to win sa mga candidato.


Alagad dai man sinda nakabuelo mantang padagos an security operation kan mga soldados kan 9th ID, sabi pa ni Regencia.


Pigbuyagyag pa kan opisyal kan militar sa Bicol na kun nagkakaigwa nin operasyon an NPA laban sa tropa kan gobierno naghahagad na nin re-enforcement hale sa Southern Luzon.


Ini afuera kan padagos na pagluya nin suporta hali sa comunidad, sabi pa kan 9th ID.


Kan nakaaging eleksyon heneralmenteng naging matuninong mantang dai makahiro an kulang nang fuersa kan mga rebeldeng kumunista, sabi pa.

Share on Facebook
Share on Twitter
Please reload