Progresibong grupo na-aalarma sa panlilikidar sa saindang mga lider

June 20, 2019

Na-aalarma na an progresibong grupo sa Bicol sa sunod-sunod na panlilikidar sa saindang pag-iriba sa laog sana nin sarong semana tolo na an pigbabadil gabos binawian nin buhay.


Si Vince Casilihan, lider kan Karapatan Bikol asin Nelsy Rodriguez pamayo kan Bayan Muna sa Camarines Sur kinukondenar an makangerat nang krimen na garong sa hayop an pambabadil na dawa anong oras ginagadan sa laog sana nin sarong semana.


An pinakahuring biktima iyo si Nepthali Morada, 45 na dati coordinator kan Bayan Muna sa Camarines Sur kan taon 2013 hasta 2017, pinagbabadil nin M-16 armalite sa Barangay San Isidro, Ciudad nin Naga mga alas 7:30 nin aga kan Lunes, Hunyo 17 mantang nagpapadalagan ini kan saiyang motorsiklo hali sa saindang residencia sa Brgy. San Isidro.


Si Morada, empleado na ngonian kan Capitolyo Provincial kan Camarines Sur sa opisina kan Bise Gobernador.


Lunad sa puting pick up an suspechado na padagos pang pig-iimbestigaran kan Naga City Police Office (NCPO) mantang hinahalat ninda an cooperasyon kan mga testigos nganing makatabang sa caso.


Nakua na si numero kan conductor sticker na saro sa makakatabang ini sa imbestigasyon, sabi ni SM/Sgt. Tobias Bongon kan NCPO.


Sinabi pa ni Bongon dawa pigsasabi kan ibang opisyal kan Bayan Muna na ahente kan estado an envuelto sa krimen alagad gigibohon  ninda   an busising imbestigasyon dawa siisay paman an pig-aacusaran.


Kan  nakaaging Hunyo 15,  pinagbabadil  man gadan sinda Ryan Hubilla, 22 años na sarong senior high school asin si Nelly Bagasala 69, lider kan Sorsogon People’s Organization na parejong pinagbabadil sa Ciudad nin Sorsogon.


Duwang aldaw antes kan panlilikidar  tolong mga political prisoners sa Sorsogon na saindang tinabangan nganing makaluwas sa carcel alagad kan Sabado an duwang mga human rights workers tinudas kan riding-in-tandem.


Pigtutubodan kan progresibong grupo na an saindang suspechado iyo an state forces.


Sinabi pa na saindang pigkokonektar an panlilikidar ki Morada sa nangyari man na pambabadil ki Hubilla asin Bagasala.


An PNP sa Ciudad nin Sorsogon asin sa NCPO nagpapadagos pa kan sindang imbestigasyon.


Puon na magtukaw si Presidente Rodrigo Duterte sa Malacañan, digdi sana sa Bicol igwa nang 61 extra judicial killing asin nadagdagan pa kan tolong pinakahuring biktima.

 

Neptali Morada pinatumba kan pigtutubodan ahente kan estado.  (Retrato kua ni Janessa Savilla)

 

Share on Facebook
Share on Twitter
Please reload