Reg’l Cancer Center sa BMC, binasbasan

June 20, 2019

 

Inagurasyon kan Reg’l. Cancer Center sa BMC pinangenotan ninda DOH Sec. Francisco Duque III (ika-apat hali sa wala) kataid niya sa wala si OIC Medical Director Francisco Sales  Dr. Mary Jane Uy, Congresista Gabby Bordado, AKB Party list Representative Alfredo Garbin, PACC Chairman Dante Jimenez asin dating DOH Sec. Enrique Ona. Retrato sa itaas apat na escalon na edificio kan Cancer Center.                 (dpa)

 

 

Binasbasan na kan Martes, Hunyo 18 an pinakaenot na Regional Cancer Center (RCC) sa Southern Tagalog na namumugtak sa apat na escalon na edificio kan Bicol Medical Center (BMC) sa Ciudad nin Naga, pitong taon na an nakakaagi kan an proyecto narealisar sa iniciatibo ni dating DOH Secretary Enrique Ona kan panahon na si Dr. Efren Nerva iyo pa kaidto an Medical Director kan hospital.


Bisita sa inagurasyon iyo sinda DOH Secretary Francisco Duque III, dating DOH Sec. Ona, PACC Chairman Dante Jimenez, Congresista Gabriel H. Bordado Jr. kan tercer distrito kan Camarines Sur, Ako Bicol Party list Representative Alfredo Garbin, mga representante kan Office of Presidential Adviser for Bicol Affairs asin iba pang mga opisyal kan DOH.


Sinabi man ni  Ona, naging makulit sa pag-follow up kaidto si Nerva nganing marealisar an mga proyecto sa infrastraktura kabale na an RCC.  An BMC igwa nang bagong walong escalon na edificio, limang escalon asin apat na escalon na iyo an pig-ookupar kan RCC.


Sa mensaje ni Duque, saiyang inomaw an RCC huli ta iyo na ini an ‘’the best’’ sa pito pang mga Cancer Center sa nasyon mantang saiyang pigpasalamat si Ona na iyo an nag-iniciar kan proyecto kan panahon ni dating Presidente Benigno Aquino III.


Piglinaw ni Duque na libre an mga pasyente na ma-aprobetsar kan RCC alagad dapat igwang Philhealth. Nagpatanid an DOH sa mga Health Care provider maging pribado man asin publiko na nongka sinda maglaog sa ilegal na mga transaksyon arog kan isyu sa WellMed Kidney Center.


Makakaraot ini sa integridad sa enterong Health Care system, hinagad kan DOH an tabang kan media asin iba pang namamanuan na i-osip tolos sa saindang ahencia tanganing magpundo kun igwang nangyayaring anomaliya, sabi pa ni Duque kan ini mag-atubang sa press conference.


Sinabi  man sa media ni Dr. Sales, sa ngonian ‘’partially occupying’’ palang sinda kan RCC asin hinahalat nalang ninda an lisensiya sa linear accelerator mantang kumpleto naman sinda sa personajes.


Puon kan Martes, operational na sinda mala ngani igwa nang nagpa-chemotherapy asin igwa nang mga nakapila.


Si  Bordado na saro man sa nagtatabang sa BMC, sinabi kaini na saiyang ipapadagos na buhayon giraray an saiyang pigpapadrenohan na bill para sa upgrading asin dugang na bed capacity hali sa 500 gigibohon nang 1,500.


  An HB No. 8276 ‘’An Act increasing the bed capacity of BMC from 500 to 1,500 beds, upgrading the service facilities and professional health care therein, and upgrading funds therefor’’.

Share on Facebook
Share on Twitter
Please reload