San Felipe road bubukasan na sa two lane sa Hunyo 25

June 20, 2019

Makakahawas na sa problema sa trafico aroaldaw an mga motorista na nag-aagi sa pigpapatrabajong road widening project sa  national road kan barangay San Felipe, Ciudad nin Naga mantang pigtalaan nang bukasan sa two lane an bulos kan trafico puon sa Martes, Hunyo 25.


An 3rd Engineering District kan Department of Public Works and Highways (DPWH) na may opisina sa Baras, Canaman, Camarines Sur nag-report na sa Office of Presidential Adviser for Bicol Affairs (OPABA) asin sa Presidential Anti-Corruption Commission (PACC) nganing kumfirmaron   na  puede nang agihan an concretong two lane matapos kan curing period o pagpatagas kan semento sa Hunyo 24 alagad bubukasan sa trafico sa Hunyo 25.


Si Tammy Lee, Consultant kan opisina rehiyonal kan PACC sa Bicol nagsabi sa Bicol Mail na nagpaisi na sa sainda si Assistant District Engineer Richard Emmanuel Ragragio kan DPWH na ma-aamay an pagbukas sa two lane envez kan planong sa maabot pang Hulyo 5.


Kan nakaaging Hunyo 6, pinaapod kan OPABA , PACC Bicol,  Bembo Construction na iyo an nakakontrata kan road widening project asin an DPWH na presente sinda District Engr. Rebeca Roces asin Asst. District Ric Ragragio nganing hanapan nin solusyon na maparikas an patrabajo kan road widening project.


Si Atty. Vanesa Naval-Lee kan OPABA iyo an nag-preside kan miting nganing aramon an problema sa tahaw kan kadakul nang motorista aroaldaw an apektado sagcod na nagkasurondo asin nagpangako si Bembo De Leon kan construction firm hihidalion na an patrabajo na nagcierto na sa Hulyo 5 puede nang agihan an two lane alagad mapapa-amay an pagbukas kan tinampo.


An OPABA asin PACC nag-intervener sa abalang pagtapos kan proyecto asin sa ngonian nagcierto na an contratista na mabubukasan na an tinampo dawa sa two lane sa maabot na Hunyo 25 bako nang hulyo 5.
Nagiging estricto na an OPABA asin PACC sa mga na-aabalang proyecto sa infrastraktura huli ta apektado digdi an Build-Build-Build program ni Presidente Rodrigo Duterte.


Saindang pinatanidan si De Leon na kun padagos pang aabalahon an patrabajo irerecomendar ki DPWH Secretary Manny Villar na i-black list na sa ahencia an contruction firm.                                                                          (dpa)

Share on Facebook
Share on Twitter
Please reload