Casureco II apektado kan rotational brownouts

June 27, 2019

Apektado man an Camarines Sur II Electric Cooperative (Casureco II) Inc. sa mga harahalawig na pagkawara nin suplay nin kuryente kasunod kan pinapasunod na rotational brownouts kun nagsasakat sa red alert level an capacidad kan kuryente sa Luzon Grid area.


  Kun nagninipis an suplay nin kuryente epekto kan El Nino kabale an Casureco II sa pinapadarahan nin anuncio kan National Grid Corporation of the Philippines (NGCP) para sa nakatalaan na brownouts, sabi ni Rinner Bucay an opisyal na parataram kan cooperativa.


Kan Hunyo 21, nagtalaan nin maghapon na brownout an NGCP sa mga banwaan Canaman, Magarao, Bombom, Calabanga, Tinambac, Siruma asin iba pang mga banwaan nganing iimplementar an Manual Load Dropping sa mga lugar na ini alagad kinanselar envez pigtalaan na sa Viernes, Hunyo 28.


Sinabi ni Bucay na kun nagninipis naman an suplay nin kuryente saindang hinahalat an kumfirmasyon kan NGCP asin saindang pig-aanunciar sa publiko an pigtalaan na brownout.


Si  Nilda  Somero, regional spokesperson sa Bicol kan NGCP nagpahayag dai maiibitaran ngonian an rotational brownout huli kan mga insidente nin power supply shortage ngonian na tag-init.


Bako lang digdi sa Camarines Sur alagad sa iba pang mga cooperativa nin electricidad sa Bikol kaayon man sa manual load dropping kan NGCP.


Maging an ibang power supplier sa Casureco II nagkukulang man an saindang suplay nin kuryente alagad an solusyon iyo an pagbakal sa mas mahal na supplier hale sa WESM, an epekto iyo an paglangkaw kan singil sa tarifa, sabi pa ni Bucay.


Ginibo ini kan manijamiento tanganing maseguro na mayong mga brownouts asin kun igwa man an problema hale sa NGCP. (dpa)
 

Share on Facebook
Share on Twitter
Please reload