Php 100-M na infra proj sa Naga hinale

June 27, 2019

Maabot  sa  sangatos  milyones  peso  na  mga  proyecto   sa infrastraktura  sa Ciudad nin Naga an dai maiimplementar ngonian na taon na kabale sa fondo na mga kinaltas sa 2019 annual budget kan 3rd Engineering District kan Department of Public Works and Highways (DPWH) sa Camarines Sur. 

 

An 3rd Engineering District iyo an congressional district ni Diputado Gabriel H. Bordado Jr. kaayon sa nagkaperang engineering district kan DPWH na ginuntingan nin dakulang fondo kan gobierno nasyonal.


An apektadong proyecto na kabale kuta sa dapat iimplementar ngonian na taon iyo an road widening project  hale sa M.T. Villanueva Avenue sagcod sa kalabaan kan Magsaysay Ave na masundo sa rotunda sa Concepcion Grande na nagcacantidad nin P36 milyones asin an expansion kan Magsaysay Bridge na nagcacantidad nin P60 milyones na nagtototal nin P96 milyones.


Si Assistant District Engr. Richard Emmanuel Ragragio nagpahayag sa Bicol Mail na kun kan nagtalikod na taon 2018 igwa sindang P1.2 bilyones na annual budget alagad ngonian na 2019 igwa na sanang P326 milyones na kinaltasan nin dakulang cantidad na P874 milyones.


An Engineering District nasumiter sana kan saindang mga propuestong proyecto asin an cantidad kaini alagad yaon na an desisyon sa congreso asin kan saindang opisina central.


Haros kadakle kan mga engineering district kan DPWH sa Bicol kaayon sa listahan na kinaltasan nin dakulang fondo mantang pigtawan kan administrasyon Duterte an ibang darakulang proyecto sa infrastraktura sa lindong kan programa sa Build-Build-Build.


Digdi sa Bicol kabale sa pinabulosan nin fondo sa BBB program iyo an Bicol Expressway na pendiente naman an konstruksyon.


Dawa dakulang cantidad an nawarang fondo, igwa pa sindang iimplementar na mga proyecto na kinababalehan kan flood control, rehabilitasyon nin tulay, covered court asin multi-purpose building.


Mayo nang iimplementar na  road  widening project sa Ciudad nin Naga asin sa mga banwaan kan tercer distrito alagad si pendienteng proyecto piglalaoman na tatawan man giraray nin fondo sa 2020 annual budget, sabi pa kan DPWH 3rd Engineering District.                                                                                 
                              (DPA)

Share on Facebook
Share on Twitter
Please reload