Kapa nagprubar magbukas opisina sa Bicol

Opisina kan Kapa sa Ciudad nin Legazpi dai na madadagos.

Ciudad nin Legazpi – Natagalpo an operasyon kan bagong sanga kan opisina kan Kabus Padatoon (Kapa) Community Ministry International sa ciudad na ini kasunod kan higot na pag-monitor kan opisina rehiyonal kan Securities and Exchange Commission alagad dai ma-araman kun igwa pang ginigibong underground activities.

Sa ngonian dai na nakakarecibe nin sombong an SEC Bicol kun padagos pa an saindang operasyon matapos baklason na si mga tarpaulin kan KAPA Legazpi Branch sa 2nd Floor Encarnacion Bldg. sa Rizal St. Ciudad nin Legaspi.

Ini an mga pahayag ni OIC Regional Director Atty. Norma A. Tan-Olaya kan SEC Bicol kan maconduciran nin intrevista kan Bicol Mail sa tahaw kan mga impormasyon na igwa nang bagong miembros sa Bicol na pigkalap asin nagtapos na kan saindang seminar/training, alagad an osip na ini dai pa makumfirmar kan opisina kan SEC.

Si Presidente Rodrigo Duterte iyo an nag-orden sa mga awtoridad na sakyadahon an Kapa offices sa Cebu asin Nueva Vizcaya huli kan suboot pagkaka-envuelto sa investment scams.

Apesar kan mga aksyon na ini kan gobierno nagprobar pang magbugtak kan saindang branch office sa Ciudad nin Legazpi.

An Kapa, may base sa Surigao del Sur na sarong religious corporations, nag-sosolicit nin investment hale sa publiko sa paagi nin pig-aalok na mag-donar nin ano man na cantidad karibay nin pagbuelta sa sainda kan bulanan na treinta por ciento.

Alagad an arog kaining operasyon, pinapaguirumdom ni Olaya malinaw na investment scams asin kaipuhan isikwal na kan publiko.

An kagpundar kan Kapa si Pastor Joel Apolinario asin nagkapera pa sa saiyang mga pag-iriba sinangatan na nin caso kriminal kan SEC sa Department of Justice huli sa pagbalga kan kan Acta Republica 8799 na mas midbid sa Securities Regulation Code of the Philippines.

Kabale sa mga respondiente sinda trustee Margie Danao, Corporate Secretary Reyna Apolinario asin lima pang iba. (dpa)