Emergency earthquake drills dai na ipapa-aram sa publiko

July 4, 2019

 EARTHQUAKE DRILLS. Search and Rescue Unit kan City Hall nangenotan sa pagkua kan mga saginsagin na pasyente hali sa Camarines Sur National High School.                                             (dpa)                                                                                                                                   
 

Pighahace kan City Hall na an masunod nindang emergency earthquake drills dai na ipaaram sa publiko o ‘’unannounced’’ nganing maheling an aktual kun gurano na kaandam an Ciudad nin Naga kun magkaigwang makusog na paglinog.


Si Ernesto Elcamil, jefe kan Naga City Disaster Rick Reduction Management Council (NCDRRMC) nagpahayag na sa ginibo nindang coordinating meeting saro sa pighahace na isusunod ninda ‘’unannounced’’ earthquake drill matapos kan mga na enot nindnag emergency drills na pinapa-aram sa publiko sagcod sa sinasarahan an bulos nin trafico.


  An mga pag-andam sa calamidad importanteng marhay mala ngani nagbugtak nin instrumento an Philvolcs sa atop kan opisina kan NCDRRMC sa City Hall na mawot sabihon kaini may pigsusokol  sinda digdi nin posibleng fault line na nagkokonektar sa Lake Bato asin sa Ginayangan asin sa Ragay fault  asin ini iyo an saindang pig-aandaman, sabi pa ni Elcamil.


Duwang taon na an nakakaagi an Universidad de Santa Isabel (USI) nagconducir na kan saindang ‘’unannounced’’ drill alagad an resulta igwang mga nag-panic.


Sinabi ni Elcamil katuyohan kan planong nganing madeterminaran kan NCDRRMC kun gurano na kaandam an mga escuelahan pampubliko maging sa pribado asin iba pang mga establisimiento.


Sa mga nakaaging earthquake drill, naririsa kan NCDRRMC na an mga participantes dai pigseseryoso an saindang pag-ensayo makakumple na nagkaigwa man sindang drill.


Kan nakaaging Hunyo 20 nagkaigwang School Belt Emergency Drill na pigparticiparan nin maabot sa veinte cinco mil na estudiantes, paratukdo asin empleados kan Departamento de Edukasyon.  katuyohan kaini nganing matawan nin giya an mga estudiantes kun ano an dapat nindang gibohon kun nagkakaigwa nin makusog na paglinog.


An emergency drill pigparticiparan kan Bureau of Fire Protection, Ching Po Tong Fire Brigade, City Health Office, Search and Rescue Unit, Naga City Police Office, Public Safety Office asin iba pang ahencia.


Sinabi pa kan NCDRRMC, an mga ginigibo nang drills kasunod kan saindang  pag-implementar kan City Ordinance No. 2018-040 na nagmamando sa mga establisimiento de negosyo, educational institution hale sa  pribado asin pampublico, Barangay,  asin iba pang grupo nganing parating andam an mga taga ciudad encasong may nangyayaring calamidad.


Si Consejal Joselito Del Rosario iyo an nagpadreno kan ordinansa na saindang pigpangenotan an emergency drills asin kan NCDRRMC.      
                                 (dpa)

Share on Facebook
Share on Twitter
Please reload