NAKATIWANG-WANG NA TULAY: Pinunan ni GMA dai pinadagos ni PNoy

July 4, 2019

 

Nakatiwang-wanag na San Antonio Iriga City-Salvacion Polangui Bridge, ipapadagos giraray kasunod kan asegurasyon sa OPABA ni DPWH Sec Mark Villar na papabulosan nin fondo.                            (OPABA FB)   

 

Pinunan an patrabajo kan milyones peso na tulay  na makonektar hale sa sarong barangay sa Ciudad nin Iriga pasiring sa Polangui, Albay alagad pagtukaw nin bagong administrasyon sa Malacañan dai na pinadagos asin sa ngonian nakatiwang-wang an proyecto.

 

Maabot sa 120 metros an laba kan tulay asin pigkakarkulo nagcacantidad nin P100 milyones alagad hinahanap pa an record sa DPWH kan tunay na cantidad asin siisay nakakontrata kan proyecto.


Nagkaperang residentes kan Barangay San Antonio, Ciudad nin Iriga an nag-osip sa Office of the Presidential Assistant for Bicol Affairs (OPABA) asin Presidential Anti-Corruption Commission (PACC) sa nakatiwang-wanag na proyecto sa San Antonio Iriga City asin Salvacion, Polangui, Albay.


Si Tammy Lee, regional coordinator kan PACC Bicol nagpahayag sa Bicol Mail na sa saindang inisyal na imbestigasyon an proyecto pigpunan kan panahon ni dating Presidente Gloria Macapagal-Arroyo alagad dai na pinadagos sa bagong administrasyon ni dating Presidente Benigno S. Aquino III na pigtutubodan an dahilan sa politica.


Nagkaperang concern citizens sa Ciudad nin Iriga an nagsombong asin pigkuanan nin retrato nganing ipadara sa saindang opisina, sabi pa ni Lee.


Pigsusog kan OPABA asin PACC an proyecto sa 5th Engineering District kan Department of Public Works and Highways (DPWH) sa Baao, Camarines Sur alagad an district engineer digdi dai nag-aaram kan patrabajo mantang bako pa siya kaidto an DE.


An paliwanag ni DE Nestor Gurimbao na bako pa siya an pamayo kan engineering district kan punan an patrabajo.


Pig-aaraman na kan OPABA asin PACC kun igwang counterpart na fondo an lokal na gobierno kan Camarines Sur asin Albay.


SECRETARY VILLAR TOLOS NAG-AKSYON    

 

Naghinayang an OPABA asin PACC sa milyones peso na gastos asin saindang dinulok ki DPWH Secretary Mark Villar nganing ipadagos asin mapabulosan nin fondo.


Tolos nag-aksyon si Villar asin pigtagamahan nin fondo para sa ngonian na taon asin ini malaog sa Build-Build-Build program ni Presidente Rodrigo Duterte.


An saindang ahencia bako lang mag-imbestigar kan may anomaliyang proyecto alagad magtabang nganing mag-asenso an rehiyon Bicol, sabi pa kan PACC.                         (dpa)

Share on Facebook
Share on Twitter
Please reload