LGU Pamplona may duwang alcalde

July 11, 2019

Duwa na an alcalde sa Pamplona, Camarines Sur matapos magpasar nin resolucion an Sangguniang Bayan na saindang pigmimidbid si Bise Alcalde Ronaldo Franco bilang acting mayor mientras na si Mayor elect Gemino Imperial,  cuestionable an saiyang pag-asumir dawa na ganador sa nakaaging midterm elections.    


An dahilan kan SB si Imperial pinapahale sa posisyon kan Department of Interior and Local Government (DILG) huli ta diskalipikado  nang magtukaw bilang jefe ejecutivo kan banwaan kasunod kan naging desisyon kan Ombudsman na kinakastigo siyang perpetual disqualification sa ano man na puesto sa gobierno.  


Nanindugan an alcalde na mayo pang ‘’finality’’ sa sentencia sa saiya kan Ombudsman asin mientras na pendiente pa an pigsangat  niyang  motion for  reconsideration sa Corte Suprema dapat magpadagos siya sa pagfuncionar bilang jefe ejecutivo.


Paralisado an mga transaksyon sa LGU mantang dai tinawan nin awtorisasyon si Imperial na mag-withdraw nin cuarta para sa pansueldo sa mga empleados maging sa mga programa sa basic services.


Kun dai mareresolberan kan DILG an controvercia sa LGU maglalawig na prakasado an mga transaksyon huli ta cuestionable an pagfirma ni Imperial sa mga documentos. An bise alcalde na immediate successor kan alcalde  na pinapatukaw na kan SB nag-aalangan pang mag-asumir bilang jefe ejecutivo.


Sa resolucion kan SB, si Franco iyo an tinatawan nin awtorisasyon sa mga transaksyon sa bangko alagad an bise alcalde na iyo an immediate successor kan alcalde nagsayuma munang mag-asumir sa puesto sa dahilan na dai siya makadagdag sa controvercia sa LGU.    


An naging aksyon kan SB matapos mag-atubang sa sesyon regular ninda kan Martes, Hulyo 9 si DILG Provincial Director Melody Relucio  na  nagkukumfirmar na diskalipikado na an elihidong alcalde na magkapot nin ano man na posisyon sa gobierno huli sa desisyon kan Ombudsman.


An mayoriang miembros kan SB na nagboto sa resolucion kinababalehan ninda, Gil Bordon, Nisa Sibulo, Jerry Aquino, Dennis Castilla asin an mga ex-officio member na sinda SK Federation President Ching Francisco asin Liga ng Barangay President Lito Legaspi. Sinda anas bakong kaalyado sa politica ni Imperial asin an apat iyo an dai nagpabor.

 

IMPERIAL PALABAN PA


Pinaliwanag kan elihidong alcalde na dapat magpadagos siya sa puesto sa dahilan na siya elehido kan saindang banwaan, nag-take oath bilang alcalde.


Dinagdag pa kaini, na ibinasura kan Comelec si petisyon kan saiyang  naging kalaban sa pirilian lokal na si Alcalde Ace Cruz. Hinahagad ni Cruz na dapat diskalipikadong magpadagos kan saiyang candidatura si Imperial huli kan desisyon kan Ombudsman.

 

DESISYON KAN CORTE VS  IMPERIAL DAI NAGBABAGO


Alagad sa paliwanag man kan DILG sa Sangguniang Bayan, totoo na si Imperial ganador sa eleksyon, nag take oath bilang alcalde asin dai siya pigdiscalipikar kan Comelec alagad  malinaw sa desisyon kan corte  dai nagbabago diskalipikado siyang magpugol nin ano man na puesto sa gobierno.

          
Sinabi pa ni Relucio na nagsurat na si Imperial ki DILG Secretary Eduardo Año na nagpapaliwanag kun tano ta dai dapat magpadagos pa siya sa opisina.


Alagad hahalaton kan DILG Camarines Sur an pinakahuring gigibohon na aksyon kan saindang opisina central. (dpa) 

Share on Facebook
Share on Twitter
Please reload