Pulicia sa housing program sa Bicol estrictong pinapasunod kan HUDCC

July 11, 2019

An Housing Urban Development Coordinating Council (HUDCC) mandato kan gobierno na maggibo nin mga pulicia asin estratihiya nganing estrictong ipasunod an mga reglamento sa socialized housing para sa mga pagpaharong sa familia na igwang hababang income.


Ibinabawal na mag-ayon an mayayaman ngani sanang maka-utang para sa pagpaharong mientras na limitado sana sa sadit na metros cuadrado  lote an maookupar para sa pagpaharong.


Ini an mga pahayag sa Bicol Mail ni Engr. Cristina Abaño, regional coordinator kan HUDCC Bicol kan siya maging bisita sa groundbreaking kan Lunes, Hulyo 8 sa bagong subdivision sa Brgy. San Felipe, Ciudad nin Naga.


An housing project igwang hiwas na 2.3 hektarya na harani sana sa gilid kan tinampo asin pacil sa transportasyon sa mga miembros kan Home Owners.


Si dating Consejal Julian Lavadia Jr. na saro sa nag-intruducer sa housing program kan HUDCC sa urban sector sa ciudad presente sa seremonya, opisyales de barangay asin an mga miembros kan Villa Maria Home Owners Association na pinamamayohan ni Jesusa San Agustin bilang presidente asin mga opisyales kan HOA.


An opisyal kan HUDCC nagsabi na mayo na sindang naheheling na problema sa implementasyon kan housing program huli ta completo na an documentos asin yaon na sa proceso kan saindang loan application sa Social Housing Finance Corporation (SHFC). 


 An Villa Maria Home Owners Association igwang 220 miembros benepisyaro na lambang home lot igwa sanang sukol na 64 metros cuadrado.


An cantidad para sa socialized housing nag-aabot sa 400 mil pesos mantang igwang 2,700 pesos na amortization cada bulan na dapat mabayadan sa laog nin veinte cincong taon.


Pigseguro kan HUDCC na dapat an mga benepisyaryo nasa marginal income na familia.


Pigpaliwanag pa na an saindang ahencia natugdas kan panahon ni Presidente Benigno Aquino III asin an saindang pinaka mayor na katuyohan dapat yaon an saindang coordinasyon sa mga shelter agencies na kinababalehan kan National Housing Authority, SHFC, Pag-ibig Fund asin Housing and Land Use Regulatory Boards.


An HLURB an saindang mandato iyo pag-regulate asin ma-monitor an mga subdivision kun nagsusunod sa Batas Pambansa 220 para sa socialized housing.

Share on Facebook
Share on Twitter
Please reload