Voters registration dagos dawa i-uktaba an Brgy., SK elections

July 11, 2019

Madagos man o dai an pigtalaan na Barangay asin SK elections sa Mayo 11, 2020 magpapadagos an voters registration puon sa Agusto 1 hasta Septiembre 30, 2019.


Igwa nang resolucion an Commission on Election (Comelec) na ipadagos an voter registration activity dawa igwang mga propuestong ley sa senado na plano naman na i-uktaba an Brgy., SK elections mientras na natatapos palang an midterm elections kan Mayo 13.


Si Alexander Marpuri, opisyal na parataram kan Comelec Camarines Sur nagsabi an mandato kan saindang opisina central dapat ipadagos giraray an voters registration bilang pag-andam sa pirilian sa Mayo 11, 2020.
Kun igwang pinasar na ley an congreso sa paggilid naman sa pigtalaan na eleksyon nurong taon mahalat sana sinda nin orden hale sa saindang opisina central, sabi pa ni Marpuri.


An mga kaipuhan na magpalista sa Comelec iyo si mga nag-eedad na 18 años pataas  mantang  sa SK dapat nag-eedad nin 15 hasta 30 años, ini si mga botantes na dai macandidato.


Alagad si nag-aambisyon na magcandidato sa SK dapat nag-eedad nin 18 hasta 24 años.


Sinabi kan Comelec kabale sa saindang trabajo iyo an cleansing antes kan pagpadagos sa pagpalista nin mga botantes sa Agusto.


Mawot maaraman kan commission kun pera pa an kinakaipuhan para sa deactivation, si mga gadanan na base sa listahan kan Local Civil Registrars.


An rehistradong botante puedeng ma-deactivate kun siya nasentenciahan nin final judgment nin pagkakapreso nin dai ma-sarong taon. Kabale si mga nakakomiter nin krimen arog kan disloyalty to the government, arog kan rebellion, o ano paman na krimen kontra sa national security.


Si dai nakaboto nin duwang magkasunoan na regular elections maatubang sa deactivations.


An pagpadagos sa pagpalista  afuera kan mga regular na aldaw kabale an mga aldaw kan Sabado, holidays, sa mga opisina lokal kan commission. (dpa)

Share on Facebook
Share on Twitter
Please reload