“Political Will”

July 18, 2019

 

Nali an mga Pilipino sa politiko o opisyal kan gobyerno na may kusog boot na maggibo kan mga bagay na marhay pero bakong popular.


Lakop sa mainstream asin social media, sa radio, asin tv, an kaogmahan kan mga Pilipino sa ginigibo ni Mayor Isko Moreno Domagoso sa Ciudad nin Manila, an cavesera kan nasyon, na malinigan nin mga illegal poon mga paratinda, paradahan, eskwaters, maaating kanal/estero, aponan basura pati pag-odo sa mga plaza poon sa primerong semana kan saiyang bagong administrasyon.


Mala ta may mga Bikolano ngani na gusto na tulos pa presidentihon kan Pilipinas si Isko maski sabi niya ngani dai pa man siya minapoon kan saiyang programa sa Manila.


An ginigibo niya totoong dai ginibo kan naka-aguing alkalde poon ki Amang Rodriguez, Arsenio Lacson, Antonio Villegas, Ramon Bagatsing, Alfredo Lim, Herminio Atienza asin Erap Estrada kaya kita nagkabirigla. Pero antes kan eleksyon kan Mayo 13 pinangako niya sa mga taga  Manila na paparaon niya an mga illegal kun siya manggana. Nagtubod an mga Manilenyos kaya sinipa sa puwesto si Erap maski dating Presidente kan Pilipinas.


An malaen kaini ta pigpaparaoromaw ta na tulos an juven na Mayor na si Isko, 44, dating artista sa pelikula, pobreng taga Tondo, nagpoon konsehal sagkod na naguin vice-alkalde, iyo an binotohan kesa sa mas popular asin poderosong   si Estrada.


Habo siyang pag-omawon ta dai pa ngani daa siya napoon. Abangan an mas dakol pang pagbabago sa Ciudad nin Manila.


Ngalas ako ta an ibang mga Pilipino lalo na an mga elitista, edukado asin may inadalan kuno, mayayaman, asin trapo dai naapreciar si mga pagbabago na ginibo tulos ni Presidente Digong Duterte sa nasyon poon kan 2016 kan maghilig na sa puwesto si  Presidente Noynoy Aquino.


Enot na guinibo niya iyo an ilansar an lagduan na giyera kontra sa illegal na droga sa entering nasyon,  magbugtak nin mga kumunista sa saiyang gabinete,binukasan an gobyerno para sa orolay pangkatoninongan para sa gabos na mga rebelde, pinonan an programang Build,Build,Build tanganing magbugtak nin dakol na mga tinampo, aeropuerto, tulay perocarel, edificio, ospital, eskwelahan sa enterong Pilipinas,linigon an Boracay Island, linigon an Manila Bay magdeclarang  martial law sa Mindanao tanganing masabat an terorismo asin magkaigwa nin indepiendienteng foreign policy na kaamigo an gabos na nasyones bako lang an Amerika kundi pati Tsina asin iba pa.


An guibo kan duwa, ni Mayor Isko Moreno saka Presidente Duterte, iyo an pig-aapod na political will. Guinibo iyan kadto ni Presidente Manuel Quezon asin maski ni Presidente Ferdinand Mascos.


Sa kampanya pa lang pigtuga na ninda an mga pagbabago asin nagtubod an mga botantes kaya sinda nanggarana sa eleksyon. An desisyon na iyan kan mga Pilipino dapat tang igalang sa lindong kan demokratikong sistema de gobyerno. 


Maski may mga opposisyon pero pinapadagos ninda an saindang programa asin proyekto, daing pagalangan sa mga tuyaw, dawa dai pag-omawon masunod sana an pinagboboot kan ley asin maservihan an kadaklan kan mga Pilipino.


An pag-omaw kaya kan iba depende sa interes na pansadiri kan nag-oomaw. Kun dai niya napapakinabangan an omaw naguinguin tuyaw.


Sa puntong ini sa istorya kan satong nasyon kabali na an Manila, an capital of the Philippines, kaipuhan na an mga pagbabago pati kan Ley Fundamental kun salto na sa pangangaipo kan banwaan.


An resultado kan nakaaguing eleksyon kan Mayo 13, panalmingan kan tunay na sintemiento kan mga Pilipino, na kaipuhan na talaga an pagbabago.


An Senado asin an Congreso titutugutan kan mga tao na isulong na an mga pagbabago.


Kaya dai kita magngalas na an Pilipinas pasiring na sa bagong aldaw, bagong panahon, bagong sistema ta ini iyo an gusto kan mayoriya kan labing 100 milyones na mga Pilipino. 


For comments/ reactions, please contact Cp nos. 09296281848/09612799828 or verdaderernesto@yahoo.com/fb: Ernie Verdadero

Share on Facebook
Share on Twitter
Please reload