Bakong kaalyadong mga vokal dai tinawan komite

July 18, 2019

Pili, Camarines Sur. ‘‘No heart feeling’’ kun dai kami tinawan nin committee chairmanship envez yaon gabos sa siyam na miembros kan junta provincial na kaalyado ni Gobernador Migz Villafuerte.


Ini an halipot na mensaje ni Vokal Emmanuel Llaguno kan ika-apat na distrito kan Camarines Sur kan makaulay kan miembros kan media matapos kan saindang sesyon regular.


Sa treceng miembros kan junta provincial apat an bakong kaalyado sa politica kan bise gobernador na kinababalihan ninda Llaguno, Trexie Clemente, Gerald  Pilapil, asin Ruperto Alfelor. Sinda anas dai pina-onrahan kan mayoriang miembros na magpugol nin komite.


Si Vokal Clemente kan premirong distrito namumundo kan nangyari alagad mayo sindang magiginibo huli ta desisyon kan mayoriang miembros.


Ipinahayag man ni Vokal Pilapil na interesado na magpugol kan committee chairmanship kan tourism committee nagsabi nasa minoria sinda alagad huli kan saiyang background sa programa sa turismo pigmamawot niya kuta an sinambit na komite.


Pinaagi sa nomination an pag-pugol nin mga committee chairmanship alagad napag-araman na preparado na an listahan na tuyong isikwal an mga vokal na contra partido ni Villafuerte asin Papin.


Sa ginibong inaugural session kan junta naging bisita si Gob Villafuerte asin saro sa saiyang pigtawan nin duon na tapos na an eleksyon asin politica dapat magtarabangan na sinda. 


Alagad iba man an nangyayari sa junta tinawan nin prioridad iyo an politica sa pagpugol nin mga komite.


An junta igwang dating 36 na mga komite alagad sa pag-aadal kan Ad hoc committee na pinamamayohan ni Vokal Angel Naval ginibo na sanang 16 asin si iba ginibo na sanang sub-committee.


Sa  treceng  miembros kan junta provincial siyam an mga kaalyado  ni Villafuerte asin Bise Gobernador Imelda Papin na kinababalihan ninda Vokal  Angel Naval, Romulo Hernandez, James Jaucian, Nelson Julia, Manny Noble, Wilfredo Oliva, mga  ex-officio  member na sinda ABC President  Nelly  Largo, PCL President Jeorge Buengua,  asin SK President Russel Pala.
 

Share on Facebook
Share on Twitter
Please reload