Designadong Acting VM nagsayuma kan puesto

July 18, 2019

Nagsayumang mag-asumir sa puesto si topnotcher Councilor Josefa Pabi bilang immediate successor na magtukaw acting vice mayor karibay ni bise alcalde Ronaldo Franco na designadong kan Department of Interior and Local Government bilang acting mayor karibay kan discalificadong Alcalde Gemino Imperial kan Pamplona, Camarines Sur.
 

Si Acting Mayor Franco nagsabi na nag-informar sa saiya si Consejal Pabi na dai maasumir sa puesto bilang acting vice mayor na kaipuhan niya munang aramon an opisyal na kasugoan kan DILG mientras na igwang pendienteng motion for reconsideration sa corte si Imperial.


Sa sesyon regular kan Martes, Hulyo 16 si Pabi dai nag-atendir sa sesyon mantang duda siya sa pagtukaw bilang acting vice mayor. Dai man nag-atendir si mayoriang miembros kan sangguniang sagcod na dai nagkaigwa nin quorum.


Apektado na an transaksyon sa lokal na gobierno huli ta kaipuhan kan acting mayor an awtorisasyon hale sa SB na puede na siyang magpirma sa tsikie asin sa mga pag-withdraw nin cuarta para sa pansueldo sa empleados. 


Sa kawaran nin quorum an piglalaoman niyang awtorisasyon nagpalyar mientras na kaipuhan pa ini nganing mayong cuestion sa saindang depository bank.


An orden kan DILG hale ki Secretarya Eduardo Año na pig-implementar sana kan ahencia digdi sa Camarines Sur nganing midbidon na an acting mayor huli ta dai na tinututogan si Imperial na magpadagos sa puesto kasunod kan naenot na desisyon kan Ombudsman na perpetual disqualification sa pagpugol nin ano man na puesto sa gobierno.


An caso kan elihidong alcalde huli sa pagpa-arkila niya sa sarong negosyante sa  hababang bayad sa heavy equipment  kan LGU na nagbabalga sa saindang ordinansa lokal.


Sinabi kan DILG na totoo na gana sa pirilian kan Mayo 13, 2019 si Imperial asin  nag-take oath siya bilang elihidong alcalde alagad an saiyang caso sa desisyon kan Ombudsman dai man nagbabago kaya ngani pig-implementar kan ahencia na patukawon si Franco bilang acting mayor.


Apesar na pinatukaw na kan DILG an acting mayor, alagad si Imperial habo pang maghale sa opisina kan alcade.  An nangyayari sa ngonian si Franco nag-oopisina sa Sangguniang Bayan asin hagad niya an cooperasyon kan mga empleados kan LGU sa pagpadalagan kan LGU.


An dahilan na igwa pa siyang pendienteng motion for reconsideration sa Suprema alagad an sabi kan acting mayor an desisyon kan Corte de Apelasyon na ‘’final and executory’ na an desisyon kan Ombudsman.


An acting mayor iyo na an reconesido kan mga department head asin empleados kan lokal na gobierno asin kan Sangguniang Bayan.


Kan nakaaging eleksyon dinaog ni Imperial nin 300 na boto si dating Alcalde Ace Cruz.


An certifico de candidatura ni Imperial sa Commission on Election pigcuestion ni Cruz alagad pigbasura.                   (dpa)

Share on Facebook
Share on Twitter
Please reload