Duwang GPS kan Philvolcs nagrerecibe kan epicenter sa Naga

July 18, 2019

Duwang Global Possession System (GPS) na pig-instelar kan Philippine Institute of Volcanology and Seismology (Philvocs) sa Ciudad nin Naga intensyon na pigdestino digdi nganing ma-monitor an magnitude kan linog mientras na yaon digdi an mga darakulang mga edificio sa Camarines Sur.


Namumugtak sa rooftop kan Raul S. Roco Library sa City Hall asin an ika-duwa yaon sa bukid Isarog sa Barangay Panincuason.


Ini an pahayag sa Bicol Mail ni Ernesto Elcamel, pamayo kan Naga City Disaster Risk Reduction Management Council  (NCDRRMC) kan lokal na gobierno kan ciudad alagad saiyang piglinaw na dai man ini nanga-ngahulogan na igwang pigmo-momonitor na fault line sa laog kan ciudad.


Kun magtama sa ciudad an 6.4 na magnitude earthquake iyo an dapat pag-andaman na delikado sa mga darakulang edificio, segun sa pinaabot na informasyon kan Phivolcs sa NCDRRMC.


Sinabi pa ni Elcamel an duwang GPS iyo an nagmo-monitor kan epicenter sa Camarines Sur na direktang narerecibe sa opisina central kan Philvolcs.


An mga lugar sa Camarines Sur na igwang fault lines iyo an Ginayangan, Sipocot, Ragay, asin Lake Bato. 
An GPS sa bukid Isarog iyo man an makakadeterminar kun magkokonektar sa tolong mga lugar sa CSur na igwang fault lines.


Si Director Eduardo Laguerta kan Phivolcs sa Bicol kan maging bisita sa sesyon regular kan Sangguniang Panlungsod perang taon na an nakakaagi nagsabi dawa mayong fault line sa Naga alagad huli ta kababan an lugar kan ciudad dai mahahali an liquefaction potential o paglumoy kan irarum kan daga kun magkaigwa nin halawig na pagbulos nin uran asin mapeligro kun igwang paglinog. Saiyang piglinaw asin sinikwal an posibilidad na mayo pang nangyayari huli kan mga pagbulos nin uran nagkakaigwang linog.


An NCDRRMC nagpahayag pa na padagos an saindang mga ginibong earthquake drill bako lang sa mga establisimiento de negosyo envez maging sa mga escuelahan asin iba pang mga edificio, ini bilang pag-andam sa ano man na calamidad.      (dpa)
   

Share on Facebook
Share on Twitter
Please reload