Viaje kan PNR sususpendiron

An Philippine National Railways (PNR) sa Ciudad nin Naga nagkumfirmar na madadagos an suspension kan viaje sa perrokaril na may rutang Naga-Sipocot oras na gamiton na an makina kan tren na gagamiton sa pagguyod kan kren hale sa Ciudad nin Naga pasiring sa Sariyaya, Quezon.

Aaboton nin mga sarong semana mayong viaje an commuter train alagad kun mapadali an viaje kan kren makakabuelta sa regular na rutang Ciudad nin Naga asta sa Sipocot, Camarines Sur.

Si OIC Manager Antonio Bare nagpahayag huli ta saro sana an makina kan train sa Ciudad nin Naga mayo sindang magiginibo cancelaron an viaje.

Dai paman pigtalaan kun nuarin sususpendiron an viaje mientras na pighahalat kun nuarin dadarahon sa Quezon an Kren.

Kaipuhan an sinambit na heavy equipment nganing mapakarhay an tulay sa Sariyaya, Quezon na iyo an aagihan kan mga kotse kan train para sa regular na viaje hale sa Camarines Sur pasiring sa Albay, sabi pa kan OIC Manager.

Tapos na an ginibong inspeksyon kan Engineering Department sa mga relis kan perrokaril haling Naga pasiring sa Ciudad nin Legazpi.

An kulang nalang iyo an kotse na gagamiton sa viaje sa rutang Naga-Legazpi, sabi pa.

Dakulang bagay sa mga pasajeros huli ta barato an flete asin mapalipot pa kan oras nin viaje pasiring sa Albay.

Posibleng marealisar an viaje sa bulan nin Septiembre oras na mag-abot na an mga kotse na gagamiton sa rutang Legazpi.