Casong dengue sa Naga bako pang alarming

Nag-alerto na an Departamento de Salud (DOH) sa mga lokal na gobierno sa padagos na paglangkaw kan casong dengue, sa Ciudad nin Naga nag-aabot na sa 188 an caso puon kan Enero hasta Hunyo ngonian na taon alagad dai pa pigkukunsiderar kan City Hall na nakaka-alarma an caso.

Si Consejal Sonny Rañola, chairman kan Committee on Health sa Sangguniang Panlungsod nagpahayag na dai pa ninda pigkukunsiderar na ‘‘alarming’’ an caso mientras na kontrolado an situasyon sa mga barangay kasunod kan padagos na ginigibong information drive kan mga health workers asin City Health Office sa pamamayo ni Dr. Vito ‘’Butch’’Borja.

Kasunod kan pag-alerto kan DOH, sinda Rañola asin Borja nag-aapelo sa mga comunidad sa barangay na magtabang sa kalinigan sa saindang kapalibotan nganing mahale an estaran kan dengue namok.

Kan bulan nin Mayo 2019 nagkaigwang 11 caso kumpara kan nagtalikod na taon na igwang 12 caso kan Hunyo 2019 igwang na-ilista an 13 caso kumpara kan nagtalikod na taon na igwang 20 caso asin ngonian na Hulyo zero, sabi pa sa pinakahuring datus kan City Health.

Base pa sa datus ngonian na taon puon kan Enero halangkaw si caso nagsakat sa 72 kumpara kan 2018 na igwa sanang 57, kan Febrero 40 caso kumpara kan 2018 igwang 22, Marso 38 contra 18 asin kan Abril igwang 14 contra 7.

Sa veinte sieteng mga barangay kan ciudad 24 barangay an igwa nang record nin mga caso sa dengue. An Brgy. Pacol iyo an nangengenotan nagsakat na sa 31 caso, nagsunod an Concepcion Pequeña – 20, San Felipe – 21, an mga barangay na igwang tig-walong caso kinababalihan kan minasunod, Triangulo, Cararayan, Balatas, Calauag, asin Abella. Concepcion Grande – 7, an mga barangay na igwang tig-aranum na caso iyo an Santa Cruz, Sabang, Del Rosario asin Carolina, tig-limang caso iyo an Tinago asin Bagumbayan Sur. Tig-arapat na caso iyo an Bagumbayan Norte, Liboton, San Isidro asin Tabuco, tolong caso sa Mabulo, duwang caso sa Igualdad Interior asin sarong caso sa Dayangdang.

An mga barangay na salbado pa sa casong dengue iyo an Dinaga, Lerma asin Peñafrancia.