Acting VM kan LGU Pamplona, Camarines Sur nagtukaw na

July 25, 2019

Buelta na sa normal na transaksyon an lokal na gobierno kan Pamplona, Camarines Sur matapos akoon  na  ni  Consejal Josepa Pabi an designasyon sa saiya kan Department of Interior and Local Government (DILG) bilang acting vice mayor.


Sa sesyon regular kan Sangguniang Bayan kan Martes, Hulyo 23 si Pabi iyo na an nagtukaw bilang acting vice mayor asin presiding officer sagcod na nagkaigwa na nin quorum sa premiro niyang pag-preside kan sesyon.


Magiging regular na an transaksyon sa cuarta sa saindang depository bank asin  pagpadalagan kan lokal na gobierno kasunod kan aksyon kan DILG na patukawon si Bise Alcalde Ronaldo Franco bilang acting mayor.
Naparalisar an transaksyon sa LGU huli ta nagsasayuma pang maghelig sa puesto si elihidong alcalde Gemino Imperial apesar kan orden kan DILG na bako na siya an pigrereconecer na jefe ejecutivo.


Alagad dawa naging matagas si Imperial na dai maghale sa puesto mayo na siyang magiginibo kasunod kan direktiva ni DILG Secretary Eduardo Año  na si Franco iyo na an designadong acting mayor.


Si Imperial, apesar na igwa nang perpetual disqualification na magpugol nin ano man na posisyon sa gobierno  base sa desisyon kan Ombudsman nagpadagos magcandidato asin nanggana sa nakaaging midterm elections alagad pinahale siya kan DILG huli kan desisyon kan corte.


An pinapahaling alcalde, igwa pang pendienteng motion for reconsideration sa Corte Suprema.

Share on Facebook
Share on Twitter
Please reload