Parapadyak binugbog nin opisyal kan NCPO

July 25, 2019

Si Jonathan Sibulo, sarong parapadyak binugbog kan sarong opisyal kan PNP naheheling sa retrato na garatuk an saiyang lalawgon asin dugoan pa an saiyang hinobang T-shirt.

 

 

Dugoan asin garatuk an lalawgon kan sarong parapadyak sa barangay Sta Cruz, Ciudad nin Naga matapos bugbugon sagcod na sinalpok sa gate kan Naga City Police Office an saiyang payo kan sarong opisyal kan Naga City Police Office. 


An nagrereclamong biktima si Jonathan Sibulo, dinara sa Police Station 1 ni P/MSgt. Alexander Lapid huli kan pag-eskandalo asin pangingikil sa saiya na nangyari an insidente kan nakaaging Viernes sa brgy. Sta. Cruz.


Alagad an saiyang pigtutukdo na nagparabugbog sa saiya iyo si M/Sgt. Lapid na iyo an nagdakop sa biktima sa rason na nagpapasaway sa tinampo mantang burat-burat.


Kan darahon sa jepatura si Sibulo, naheling ni Sr. M/Sgt .Manuel San Agustin na tinatangko sa gate an payo kan biktima.


Kinasohan nin ‘’alarm and scandal’’ si Sibulo kan opisyal kan NCPO asin nakaluwas na sa carcel kan Police Station 1 matapos makafiansa nin tres mil pesos.


Pinahimotikan ni Sibulo an akusasyon ni Lapid huli ta dai niya man puedeng magibo sa sarong pulis na kikilan nin cuarta.


Sa lado ni M/Sgt. Lapid saiyang pinahimotik an akusasyon kan parapadyak huli ta an nagbugbog sa saiya iyo man sana an nagkaperang mga residentes mientras na nagpapasaway ini asin eskandalo na sa publiko an ginigibo.


Maging an sahot na naheling ni Sr. M/Sgt. San Agustin na tinatangko an payo sa gate kan parapadyak, pinahimotikan pa kan opisyal kan NCPO.


An biktima nagpahayag na saiya man na sasangatan nin caso si Lapid huli ta igwa siyang mga testigos asin naheling pa sa CCTV camera kan siya kuyogon.


An parapadyak pinsan ni San Agustin na saiyang tinabangan nganing magpa-record sa police blotter kan insidente.


An casong ini iyo man an naging dahilan nganing taraman nin malaen sa jepatura si Agustin kan suspechadong pulis na si Lapid na naheling kan mga tawo sagcod na nasaway sinda sa laog kan Police Station 1.


An desmentihan kan duwang pulis na resolberan ni City Director P/Col. Felix Servita, Jr. kan pahampangon sinda Lapid asin man San Agustin.

Share on Facebook
Share on Twitter
Please reload