Sugal sa Boksing asin Politika

July 25, 2019

 

Gana an Pilipinas kontra sa dayuhan!


An nasyon Pilipinas, an gobyerno Pilipino enterong nagrurukyaw kan kapangganahan ni Senador Manny Pacquiao kontra ki Keith Thurman kan Amerika sa saindang bakbakan sa Las Vegas kan Domingo.
Pero an makangalas ta bako gabos na Pilipino ogma ta an nanggana an Pilipinong boksyador kontra  sa mas juven na Amerikano.


May nagkomentaryo ngani tulos na Bikolano, taga Rinconada, na magbayad nin tamang buwis si Pacquiao huli kan saiyang kapangganahan.


Duwang aldaw antes kan gran encontrada sa ibabaw kan luna duman sa MGM Grand sa Las Vegas, Nevada saro man na Bikolanong Atenista an nagsabi na gusto niyang madaog si Pacquiao kan saiyang kalaban.


Saro man na empleyado kan korte an nag post sa facebook na uyam na siyang perming gana si Pacquiao.
Kan nagayung-gayo an kampiyonato ni Pacquiao sa man iba-ibang timbang na an mga kalaban niya purong Mexicano na arog kan mga Pilipino na dating sakop kan mga Espanyol na menos kan mga Amerikano, an haros gabos na Pilipino  kadto gustong si Pacquiao kan perming kampyon.


Mas bilib an dakol na Pilipino sa mga Kanong boksyador arog ki Floyd Mayweather Jr., na nakadaog ki Manny, saka ki Thurman na huna ninda iyo an maparampahog ki Pacquiao. May kaiba pang kantyaw.
Nagbago an pagheling  kan ibang Pilipino ki Pacquiao lalo na an mga elitista, mayayaman, asin may inadalan kan si Pacquiao maguin senador asin maguin kakamoi ni Presidente Digong Duterte.


Pero mababasa ta sa mga facebook accounts, comments, reactions, posts na mas dakol man giraray na Pilipino an nagrurukyaw kan kapangganahan ni Pacqiuiao asin kan Pilipinas.


Arog kan dati kadaklan kan mga Pilipino, juven o gurang, lalaki o babae pati aki yaraon sa laog kan harong nagdadalan tv, nagdadangog radyo, nagheheling facebook live kan si ralaban, mayo pating trapik sa tinampo ta si tsuper saka pasahero nagdadalan boksing, pero may halong kahaditan na tibaad madaog an satong kababayan.


Popular an kawat na boksing sa Pilipinas poon pa kan panahon ni Panchio Villa labing 80ng taon na an nakaka-agui asin an kawat na basketball poon pa kan panahon ni Senador Ambriosio Padilla huli ta apwera kan mahilig kitang magpaganot, mas mahilig kitang magsugal. Mga hugador an Pilipino.


Arog kan bulang na tinokdo sato kan mga Espanyol saka jueteng na kan panahon pa ni Mahoma, popular na sa mga Pilipino ta mahilig kitang magpusta sa magkaibong na lado mala ta gana naman daa sa saiyang dakulang pusta si Mayor Chavit Singson na amigo intimo ni Senador Pacquiao.


Lalo na sa politika hugador  pa kita, pigsusugal ta an satuyang boto, kun bakong pigpapabakal tanganing manggana asin magkaigwa nin kwarta.


Sa kaso kan laban ni Pacquiao saka ni Thurman may nag post sa facebook na idto “symbolic fight between Philippines vs. U.S.A.”.


Sa  naguin resultado, now it can be told na bako lang palan  sa beauty pageant kundi sa sports lalo na sa boksing super power na an Pilipinas.


Mabuhay an Pilipinas! Salamat sa mahal na Diyos.
* * * * *   
Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 75.5 KHZ/PBN TV 5, Caceres cable, Sky cable, asin facebook live streaming worldwide. Program hosts: Ervin Borja and Ernie Verdadero.


May mga espesyal na bisita.  


Diyos mabalos.   


For comments/ reactions, please contact Cp nos. 09296281848/09613638409 or verdaderernesto@yahoo.com/fb: Ernie Verdadero
Website: www.bicolmail.net

Share on Facebook
Share on Twitter
Please reload