TF binilog sa pagdakit kan mga electrical post

July 25, 2019

An Department of Energy (DOE) asin Department of Public Works and Highways (DPWH) nagcrear na nin inter agency task force tanganing maparikas na an implementasyon kan pagdakit kan mga electric post kan mga cooperativa nin electricidad na nakakaulang sa mga road widening project kan DPWH.


Nagtapos na si enot na plaso kan DOE asin DPWH na dapat natapos kan Agusto 2018 alagad liwat naman pinalawig na an saro naman na isyu iyo an payment scheme sa mga cooperativa


Si Undersecretary Wimpy Fuentebella kan DOE nagpahayag an task force dapat maseguro sa DPWH kun an saindang proyecto sa infrastraktura arog kan road widening project igwa maninigong fondo an Department of Budget and Management (DBM) nganing macierto na mababayadan an mga cooperativa.
 Kun ma-implementar kinakaipuhan mabayadan an cooperativa nin electricidad sa mga nakakaulang asin apektadong facilidades.


 Igwang mga poste na tapos na si proyecto yaon pa sa tahaw kan tinampo asin si mga apektado pagma-implementar pa sana si proyecto, maliligis si poste huli kaini, ano man na payment scheme dapat cincuenta por ciento pagnakaigwa na  nin relocation plan itatao na sa cooperativa asin kun nakumpleto nang na-implementar babayadan na kan walat pang cincuenta por ciento.


 Sinabi pa ni Usec Fuentebella mientras na gobierno an kaulay kan cooperativa nin electricidad na sarong private entities igwang dapat sunodon na mga reglamento sa ERC.


Kaipuhan an detalye kan ahencia sa cooperativa sa cada poste,  sa isyu kun tapos na asin igwang pigtalaan na panahon.

 

An Bikolanong Usec iyo an representante ni DOE Secretary Alfonso Cusi sa mga miting sa DPWH tanganing taposon na an na-aabalang pagdakit kan mga electrical post.

 

Kun an isyu sa fondo segurado an DBM  asin naheling na an mga detalye kan relocation plan matao na sinda nin plaso sa mga regional director kan obras publica asin sa cooperativa nin electricidad.


Sa Camarines Sur II Electric Cooperative (Casureco II) haloy nang nag-implementar sa pagdakit kan mga poste alagad an problema sa ibang lugar an pagdakit kan mga poste makakalaog sa pribadong lote.

 

An iba nagtugot asin si iba nagsasayuma.              (dpa)                     
 

Share on Facebook
Share on Twitter
Please reload