Imbestigasyon sa pig-condemn na fishing port yaon na sa PACC

August 1, 2019

Calabanga, Camarines Sur – Ipinaubaya na kan lokal na gobierno kan banwaan na ini sa Presidential Anti-Corruption Commission (PACC) an imbestigasyon sa depalitong patrabajo kan dating Department of Transportation and Communication (DOTC) na ngonian DOTr sa Php50 milyones na Sabang Fishing Port.


Si Alcalde Eduardo Severo nagsabi na yaon na sa lamesa kan PACC asin Office of the Presidential Assistant for Bicol Affairs (OPABA), kun ano an saindang magiging aksyon huli ta dai na magiging operational an Fishing Port matapos madiscobre na nagaba an seawall asin nagtatagilid an edificio.


Si Tammy Lee, regional consultant kan PACC Bicol nagpahayag na an opisina rehiyonal kan Department of Public Works and Highways (DPWH), iyo an nagkunducir nin inspeksyon sa edificio na pigrekomendar na dagos nang ipa-condemn sa dahilan na nagtatagilid na an edificio.


 Sinabi pa kan alcalde na kan ikonstruhir an edificio kan Sabang Fishing Port dai nagkua sa sainda nin building asin construction permit,  kan matapos na an konstruksyon pig-turn over sa Barangay Council kan Sabang bako sa Calabanga LGU.


Napag-araman pa na an proyecto an dapat mag-implementar iyo an Philippine Fisheries Development Authority (PFDA) alagad huri nang naaraman an nagkukunstruhir kan edificio iyo an DOTC.
An proyecto narealisar kan panahon ni dating Presidente Benigno ‘’Noynoy’’ Aquino III.
 

Share on Facebook
Share on Twitter
Please reload