Leni

August 1, 2019

 

Nagkanumpungan kami kan sakong inaanak  na si VP Leni Robredo kan Martes, Hulyo 23, sa itaas kan SM City Naga. Dai tinutuyo an pangyayari. Ngalas ngani ako ta naheling ko pa lang sya sa telebisyon na yaon sya sa Batasan durante kan SONA ni Presidente Duterte.


Siyempre nagpaletrato kaming duwa na pig-post ko man tulos sa FB. Ginatos an naglike na ngaralas ta an pro-Duterte saka an VP kan Pilipinas nagkataraid, nakangirit na nagpakodak.


Haloy ko nang bisto si Leni, high school pa sa Sta Isabel, kan sya sarong miyembro kan Girl Scouts asin nagtaram ako sa atubangan ninda bilang ako saro nang broadcaster kan dekada 70.


Mayo pa si Jesse Robredo sa buhay ni Leni barkada ko na an saiyang ama na si Judge Tony Gerona asin bistado ko na an saiyang ina na si Sally.


Naheling ko sya sa BRBDP bilang bagong empleyada paka EDSA Revolution ta ako dati man taga BRBDP. Saka si JMR amigo ko na ta an saiyang tugang na si Butch iyo an manager mi sa DWLV. Magayon,formal asin mataling aki si Leni.


Kan 1987 paka EDSA Revolution, mayor na ako sa Milaor kaidto si Jesse an presidente kan Ateneo Alumni, ako man an P.R.O.  


Kinaulay ako ni Director Jesse kan BRBDP na maduman sya sa sakong opisina sa Milaor. Nagduman man nanggad mga alas 6:00 nin bangui kaibanan si Leni. Nabigla ako ta mapakarasal daa an duwa. Habo kuta na ako ta maaanggutan ako ni Judge asin ni Sally pero komo obligasyon ko na magkasal nin duwang nagkakaminorootan na parehong nasa tamang edad, kinasal ko sinda sa sarong civil wedding ceremony. Si sakuyang sekretarya an madrina saka sarong municipal councilor an padrino. And the rest is history.


Kan makalaban si Mayor Jesse saka an saiyang uncle na si Governor Louie Villafuerte, bokal ako kaidto kan provincia kan Camarines Sur kalinya ni LRV.


Kaya sa politika dai nungka kami nagkaiba ni JMR, maski kan si Leni congresswoman na saka ngonyan na Vice Presidente na.


Ogma ako ta si VP Leni iyo an pigmimirar bako lang lider kan oposisyon kundi pati kan bilog na Bikolandia.
Ako nagtutubod na kun magkaigwa nin Cha Cha asin federal na sistema de gobyerno an Pilipinas, si Leni an magiguin ina kan Bikol federal state na pwedeng maguin Prime Minister.


Maray syang lider kan oposisyon ta bakong maliga. Sya nagluluwas na magaya-gayang lalawgon kan demokrasya asin katalingkasan sa nasyon.


An mga Bikolano pati halop sa sarong Bikolanong presidente poon pa kan panahon ni Winceslao Vinzons, Dominador Aytona asin Raul Roco nangangatorugan na sinda maka-producir nin sarong hepe ehikotivo kan nasyon. Sarong prueva kan naka-aguing mid-term election kan Mayo 13 gana an mga kandidato kan Otso Deretcho bako lang sa Metro Naga kundi sa enterong Bikol.


Pero maski siring si VP Leni nagtaram na dai nya kayang patalsikon sa puwesto si Digong ta ini popular na marhay, padangat kan mayoriya susog sa mga surveys kan naka-aguing tolong taon.


Kun ako hahapoton personalmente, an pagtubod ko pinakamarhay an tandem ni Digong asin Leni para sa karahayan, katoninongan asin progreso kan nasyon.


*****   
Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 75.5 KHZ/PBN TV 5, Caceres cable,Sky cable asin facebook live streaming worldwide. Program hosts: Ervin Borja and Ernie Verdadero.


May mga espesyal na bisita.  


Diyos mabalos.   


For comments/ reactions, please contact Cp nos. 09296281848/09613638409 or verdaderernesto@yahoo.com/fb: Ernie Verdadero


Website: www.bicolmail.net

Share on Facebook
Share on Twitter
Please reload