NAWARAN TRABAJO SA PCSO: 9-k empleados apektado sa pagsara kan gaming schemes

August 1, 2019

 Lotto outlets sa Ciudad nin Naga bukas na puon kasoodma alagad dai pa makataya an saindang mga parukyano huli ta inaabot na nin udto off-line pa an saindang linya direkta sa saindang opisina central sa PCSO. (dpa)       
 

 

Puon kasoodmang Miercules, Hulyo 31 buelta na an operasyon kan mga lotto outlets alagad apektado pa an labi sa nieve mil na mga empleados asin kolektor sa iba pang mga gaming schemes kan Philippine Charity Sweeptakes Office (PCSO) sa Camarines Sur matapos ipapundo ni Presidente Rodrigo Duterte an gaming activities kaini puon kan Hulyo 27.

 

Alagad nagpapadagos an saindang pagtaong ayuda para sa medical assistance nin mga pasyente sagcod na igwa pang fondo an ahencia mientras na hinahalat sana kan PCSO Provincial Office an ano man ni direktiba hale sa saindang central office huli ta nagdedefende sana an saindang fondo hali sa charity fund.


Ini an mga pahayag sa Bicol Mail ni PCSO Branch Manager Jobet Ramos kan opisina provincial digdi sa Camarines Sur alagad kabale sa apektado iyo an mga Keno asin Peryahan ng Bayan agent huli ta nag-aarkila pa kan saindang mga puesto asin dakula si binutasan na kapital. Maabot sa 400 na pobreng empleados an nawaran nin trabajo digdi.


Nagtutubod an PCSO na pinabuelta tolos an operasyon sa mga lotto outlet huli ta mayong nangyayaring anomaliya digdi kumpara sa Small Town Lottery (STL), dai nagsusumiter kan totoo nindang ganansiya aroaldaw.


Sinabi pa ni Ramos mas dakulang numero kan mga apektado iyo an mga kolektor sa operasyon kan STL na igwang total na 8,754 sa manlaen-laen na banwaan afuera kan Garchitorena, CamSur.


Nawaran man nin trabajo an maabot sa 500 na empleados kan mga STL station.


Pigbuyagyag pa kan PCSO sa BM, aroaldaw nagpapaluwas sinda nin 224 mil pesos sa mga ayuda sa pobreng pasyente sa hospital afuera sa mga aldaw nin Sabado asin Domingo asin ini igwang total na Php4.9 milyones cada bulan.


Igwa man nin Php400 mil aroaldaw na remittance sa sainda hale sa  STL.


Sa listahan man kan Bicol PNP igwang total na 322 na lotto outlets sa Kabikolan, an Albay igwang 74 outlets; Camarines Norte – 44; Camarines Sur – 76; Catanduanes – 30; Masbate – 22; Sorsogon – 49 asin Ciudad nin Naga 27.


Sa STL, an Camarines Norte igwang pitong stations; Camarines Sur – 21; Catanduanes – 15; Sorsogon – 13; asin Ciudad nin Naga 2.


Kabale pa sa pinasarahan iyo an Keno na igwang total na 81 outlets.


 An pagbukas nin lotto outlet kaipuhan mag-kapital nin labi sa 800 mil pesos dai pa kabale digdi si arkila sa puesto.


An saindang delincia sa lotto sa paagi nin commission asin on milyon pesos kun nakakua nin jackpot price sa taya kan saindang parukyano alagad bibihira ini mangyari. (dpa)

Share on Facebook
Share on Twitter
Please reload