CamSur mayong fondo sa BBB program ni Duterte

August 8, 2019

Apesar kan Build-Build-Build (BBB) program ni Presidente Rodrigo Duterte sa mga proyecto sa infrastraktura alagad milyones pesos an hinaling fondo sa mga Engineering District kan DPWH sa Camarines Sur.

 

Sa miting na pinaapod ni dating Juez asin ngonian Presidential Assistant for Bicol Affairs  (PABA)Marvel Clavecilla sa mga opisyal kan DPWH sa Camarines Sur asin Bicol na pigrepresentaran ni ARD Engr. Esmeraldo Sarmiento, sinabi kaini na nagsusombong sa saiya an mga District Engineer huli ta dakulang cantidad na pigtapyas sa saindang 2019 annual budget.


Alagad an PABA nagsabi na mahagad siya nin dugang na fondo sa DPWH nganing matawan nin alokasyon an kaipuhan na iimplementar na mga proyecto sa infrastraktura sa Bicol.


Kabale sa nagsumbong asin  naghagad nin tabang iyo  an  mga district engineers kan 2nd Engineering district sa pamamayo ni DE Ruben Santos Jr., 3rd Engineering District  sa pamamayo ni DE Rebeca Roces asin iba pang  mga district engineers.


Sinabi ni Clavecilla, hinapot niya an mga opisyales kan DPWH kan saindang mga iimplementar na proyecto huli ta igwa pa siyang mga naheling na grabe pa an kamugtakan sa ibang national road kabale na an reblocking asin road widening project, alagad mamundo an pinaabot na bareta sa saiya kan mga district engineer asin kan opisina rehiyonal kan ahencia.


Sa reclamo kan mga DE gustohon man ninda na mag-implementar nin mga proyecto alagad dai marerealisar mientras na milyones pesos an tinapyas sa saindang budget.


An 2nd Engineering District na sakop na congressional district ni Diputado LRay Villafuerte si dapat na P2 bilyones na annual budget sa 2019, ginibo na sanang P270 milyones o diez por ciento na sana kan piglalaoman na fondo asin an 3rd Engineering District na sakop kan congressional district ni Diputado Gabriel H. Bordado, Jr. si dapat na P1.2 bilyones ginibo na sanang P360 milyones na tinapyasan nin P874 milyones.


An iba pa arog kan 4th asin 5th Engineering District kan DPWH sa Camarines Sur igwa man nin kaparejong reclamo alagad dai kabale sa tinapyasan nin dakulang fondo an 1st Engineering District na sakop kan congressional district ni Diputado Rolando Andaya, Jr.

 

CLAVECILLA NAGHAGAD NA NIN AYUDA SA DPWH

 

An aksyon kan opisina ni Clavecilla naghahagad na nin dugang na P10 bilyones ki Secretaryo Mark Villar nganing madagdagan an mga proyecto sa infrastraktura.


An cantidad para sa anom na provincia kan Kabikolan asin posibleng marealisar an dugang na fondo sa 2020 annual budget.


Naglalaom an PABA na ma-itatao kan DPWH Central Office an dugang na fondo para sa mga pangangaipo kan rehiyon Bicol na iyo man an pigpangako ni Presidente Rodrigo Duterte kan siya magbisita sa Camarines Sur pakatapos kan bagyong ‘’Usman’’.


Pigpangako ni Duterte na si fondo sa pig-abolish na road board na naghahalagang P46 bilyones tatawan prioridad sa  paagi  kan   calamity fund allocation an rehiyon Bicol.


An PABA nagsabi pa na saiya nang dudulokon si Secretary Villar  mientras na igwa nang asegurasyon sa fondo si Presidente Duterte.

Share on Facebook
Share on Twitter
Please reload