Anti-Dangling Wire Ordinance, pighagad na iimplementar na

August 15, 2019

Liwat na hinagad sa Sangguniang Panlungsod kan ciudad nin Naga na adalan an posibilidad na maiimplementar na an ordinanza na nagmamando na i-regulate o mapakarhay pa an pag-instelar asin pagpangataman kan mga kable kan manlaenlaen na utility companies, siring kan sa telefono, kuryente, internet, asin mga cable companies.


Iyan, sa kamawotan na mabawasan an makanos na hitsura kan ciudad sa itaas na parte kaini na kun saen igwang mga nagsasarabodan na linya na nakatakod sa mga poste nin kuryente.


Sinabi ni Consejal Jose Perez na hinorot niya sa sanggunian an kahagadan na maimplementar na toltol an ordinanza sa kamawotan na malikayan pa an ano man na aksidente pwedeng makadanyar sa buhay kan tao, orog na sa panahon nin kasiribotan sa para sa nagdadangadang na pagselebrar kan Peñafrancia Fiesta.


Pigkonfirmar pa kan consejal na igwang mga kable o linya na dae na man piggagamit nin huli ta pigbagohan na, alagad dae man pigharale kan mga imbweltong public utility companies.


Sinabi ni Perez na plano niyang itolod an sarong mahiwas na orolay entre kan ciudad asin mga imbweltong utility companies tanganing tawan nin dalan an implementasyon kan ordinanza.


Sa intrivista ki Consejala Miles Raquid Arroyo, ipinahayag kaini na pwera kan anti-dangling wire ordinance, dakol na iba pang magagayon na leyes na pigpanday kan sanggunian an dae naipapaotob siring kan ordinanza (City Ordinance 2017-072) na nagmamando kan mas tama asin marhay na proseso o prosidemyento sa pagpreparar sagkod pag-aprobar kan annual budget kaibahan na an iba pang appropriations kan lokal na gobierno kan ciudad nin Naga asin 27ng barangay kaini.

Share on Facebook
Share on Twitter
Please reload