ENCUENTRO KAN PA VS NPA PINAHIMOTIKAN: Pagdeclara nin martial law sa Bicol pighihimo kan militar

August 15, 2019

Pigtutubodan kan militanteng grupo sa Bicol na drama sana an pinaluwas na report kan 9th Infantry Division kan Philippine Army na nagkaigwang labi sa sarong oras na encuentro an mga soldados asin kan rebeldeng New People’s Army sa brgy. Lidong sa banwaan nin Caramoan asin sa kataid na brgy. Toytoy, Garchitorena, Camarines Sur nganing basehan kan administrasyon ni Presidente Duterte na magdeclara nin martial law sa rehiyon cinco.

 

Sa pinaluwas na press statement kan Tomas Pilapil Command kan NPA sa Partido area, ipinahayag na mayo nangyaring pakikibakbakan an saindang grupo laban sa soldados asin gibo-gibo sana an purotokan na mayong  kalaban.


Joint forces an operasyon kan 83rd Infantry Brigade, 2nd Provincial Mobile Company,  501st  Mobile Force Company asin igwa pang suporta nin duwang helicopter hali sa Philippine Air force sagcod na nagpa-uran nin bala sa pigtutubodan sa kinakampohan kan NPA sa brgy. Lidong alagad mayo man binawian nin buhay sa tropa nin mga rebelde.


An report na ini hali mismo ki Army Major Ricky Aguilar, opisyal na parataram kan 9th ID kan Philippine Army sa Bicol na may base sa Camp Elias Angeles, Pili, Camarines Sur, sabi ni James Casilihan lider kan Bayan Bicol.


Pinahayag ni Aguilar sa media na an encuentro nagpuon mga alas 2:00 kan Martes na hapon, Agosto 13 asin nagtutubod ini na igwang nalugadan na rebelde na naheling kan nagkaperang mga sibilyan.


Duda pa an lider kan Bayan na apesar pigsasabi kan militar sa Bicol na dikit na sana an miembro kan NPA alagad sa encuentro pigkarkulo kan 9th ID na maabot sa 80ng mga rebeldeng an nasagupa kan mga soldados kan gobierno.


Makaduda an report na iyan sagcod na naggamit pa nin duwang helicopter nganing paluwason na dakul an saindang kalaban, sabi pa.


An rehiyon Bicol kabale sa Memorandum Order kan Malacañan na dapat magkaigwa pa nin dugang na deployment kan tropa militar huli kan insurgencia asin kabale sa MO 032 iyo an Samar Negros Orriental asin Occidental.


Nagdududa pa an grupo na kaipuhan an dakulang insidente laban sa mga rebelde nganing magkaigwa nin ‘’justification’’ sa pagdeclara nin martial law ni Presidente Duterte, sabi pa.


Sinabi man ni Major Aguilar na normal sanang pahimotikan kan NPA, sagcod kasoodma nagpapadagos pa an hot pursuit operation laban sa nagdudolag na mga rebelde.


Sinabi pa ni Casilihan an apektado digdi iyo an pobreng sibilyan huli ta natatakot sa nangyayaring dramang encuentro.


Huli kan report kan militar sa encuentro maabot sa 250 residentes hali sa Sitio Comanse, brgy. Toytoy an nag-evacuar asin sagcod kasoodma yaon pa sa covered court kan Garcitorena, Camarines Sur.


Sinabi ni Alcalde Nelson Bueza na tolos man sinda nagpadarang ayuda sa mga evacuees nganing dai magkagurotom.           (dpa)  

Share on Facebook
Share on Twitter
Please reload