Implementasyon kan RTL prioridad kan DA

August 15, 2019

Pili,  Camarines Sur – An bagong sekretaryo kan Departamento de Agricultura (DA) nagsabi na  prioridad niya na mapatama an implementasyon kan Rice Tarrification Law (RTL) na inaprobaran ni Presidente Rodrigo Duterte kan Febrero 2018.


Sa pakikipag-hampangan ni DA Secretary William Dar sa mga opisyales kan ahencia matapos siyang mag-asumir sa puesto karibay ni dating Sekretaryo Manny Pinol, ipinahayag na mawot niyang tutukan an pagmanijar kan P10 bilyones na fondo na pig-alokar sa irarum kan Rice Competitive Enhancement Fund (RCEF).


Si regional information officer Emily Bordado kan DA Bicol nagsabi katuyohan kan bagong sekretaryo tanganing macierto na matabangan an mga paraoma na an fundo maghahali sa matitipon na tariff revenues na ibinabayad kan mga negosyante na nag-aangkat nin bagas hale sa ibang nasyon.


  Sa diez bilyones pesos na fondo, ini may katuyohan nganing matabangan an mga paraoma sa paagi kan pag-asister inporma nin production in-put, farm equipment asin training kan paraoma para mas mapalangkaw an saindang ani nin paroy.


Alagad sinabi pa ni Bordado, kabale sa marching order ni Secretaryo Dar na maghimo nin ibang programa sa pagtanum an mga paraoma bako lang sa paroy na man minsan apektado kun igwang nangyayaring kalamidad arog kan bagyo asin El Niño.


An mga paraoma nagrereclamo na kan padagos na pagbagsak kan paroy epekto kan rice tarrification law.
Sa pinakahuring aksyon kan DA asin man  ni Finance Secretary Carlos Dominguez, ipinahayag na mapaluwas sinda nin fondo nganing tabangan an mga paraoma na apektado kan RTL.


An tabang finansyal maghahale sa Survival and Recovery (SURE) program kan Agricultural Credit Police Council (ACPC) na nasa irarum kan DA.


An maghahali sa SURE program iyo man an dagdag na tabang afuera kan P10 bilyones na RCEF na itatao man sa paraoma na an fondo hali sa nakolekta kan gobierno sa taripa kan mga nag-aangkat nin bagas.


Alagad piglinaw kan DA na temporaryo sana man an saindang tabang hale sa SURE program mientras na padagos pang pigtitipon an tariff revenues. (dpa)

Share on Facebook
Share on Twitter
Please reload