SA CASURECO II: NEA naghahanap na nin permanteng GM

Naghahanap na nin permanteng general manager sa Camarines Sur II Electric Cooperative (Casureco II) an National Electrification Administration (NEA), matapos ipublicar na sa peryodico nasyonal an bakanteng posisyon na GM kan cooperativa.

Alagad nagtutubod si Director Jun Cornelio kan Naga North District kan Casureco II na mayo nang magiging karibal si OIC General Manager Emelita E. Candia kasunod kan saindang pinasar na resolucion na saindang pig-eendosar an OIC GM na maging ful fledged GM kan Casureco II.

‘’Unanimous’’ an resolucion kan junta director na nag-eendorso sa NEA na maging na siyang general manager, sabi kan director.

Si Candia, labi nang veinta años sa cooperativa asin dating nagpugol kan Corporate Planning Department antes pigdesignar kan NEA bilang OIC GM.

Kaipuhan taga laog an magpadalagan kan cooperative huli ta siya an nag-aaram kan kamugtakan kan manijamiento asin igwa pa siyang experiencia, sabi pa.

Nagtutubod an junta sa kakayahan kan OIC GM puon na magtukaw ini sa puesto kan Oktubre 15, 2018 karibay kan controvercial na dating Project Supervisor/OIC GM Engr. Nelson Lalas.

Sinabi pa kan director dawa igwang ibang aplikante na mag-ambisyon kan puestong GM alagad sainda liwat eendorso sa NEA si Candia.

An resolucion kan junta sa pamamayo ni Board President Paul Santa Ana yaon na sa lamesa ni NEA Administrator Edgardo Masongsong asin naghahalat nalang sinda kan aksyon nganing mag-nombra nang full fledged GM. (dpa)