Suspechado sa pambabadil gadan sa 4 na biktima sa highway nagpahimotik

August 29, 2019

Bula, Camarines Sur - Pinahimotikan kan saro sa tolong suspechado na nadakop kan Municipal Police Station sa banwaan na ini asin responsable sa pampapadil gadan sa magturogang na Pagtalon-an sa barangay Fabrica kan Hulyo 30.


An nadakop pigbisto kan awtoridad na si Randy Prima, residente kan barangay Fabrica asin parientes man sana kan mga biktima na mga negosyante.


An grupo ni Chief of Police, Major Fernando Cedo kan MPS Bula iyo an nagdakop ki Prima alagad nadakop sa paagi kan search warrant na pig-isyu kan corte sa caso sa ilegal na droga o an pagbalga sa Acta Republika 9165 na mas midbid sa Comprehensive Drug Acts of 2002. 


Nakumfiscar sa posesyon kan suspechado iyo an limang plastic nin shace nin shabu asin tolong bala kan calibre 45.


Si Prima, kabale sa tolong mga suspechado sa casong multiple murder huli sa pambabadil gadan sa mga Pagtalon-an na nangyari sa gilid kan highway asin  kabali siya sa pigtutukdo kan mga testigos na responsable sa krimen.


Sa inbestigasyon kan Bula PNP, an motibo sa krimen huli sa ‘’ingit’ sa negosyo.


An mga biktima sinda, Rodelio Pagtalon-an asin saiyang tugang na si Nathaniel asin Orlando Baladad y Dodon asin nakadamay pa an saiyang esposa na si Chuchi Baladad y Pagtalon-an, pinagbabaradil nin haranihan sagcod na tinamaan nin bala sa manlaen-laen na parte kan hawak na causa kan tolos na binawian nin buhay mantang pigdadalagan sa hospital.
 

Share on Facebook
Share on Twitter
Please reload