HULI SA DENGUE HOT SPOTS: Turista sa Peñafrancia fiesta dai apektado sa patanid kan DOT
An Arts, Culture and Tourism Office (ACTO) kan lokal na gobierno kan Ciudad nin Naga nagtutubod na dai man nin negatibong epekto an pinaluws na travel ban advisory warning kan Department of Tourism (DOT) sa Bicol lalo na ngonian na maabot na Peñafrancia fiesta na nagpapatanid sa lokal asin dayuhan na turista na dai magbisita sa mga lugar na declarado kan Department of Health bilang dengue ‘’Hot Spot’’.
Nagsusunod kami sa mga advisory warning kan DOH alagad dai man enterong rehiyon Bicol nasa dengue hot spot.
Sa masunod na bulan nin Septiembre rinibo nang mga deboto ni Nuestra Señora de Peñafrancia asin mga turista an magiging bisita kan Ciudad nin Naga alagad kadakli sa sainda maestar sa mga hotel.
Ini an mga pahayag ni Alec Francis Santos, jefe kan ACTO kan City Hall sa dahilan na sa saindang experiencia an mga turista pag-abot sa mga medical bulletin an saindang pigsusunod iyo an local advisory.
An gawi kan mga turista nagtutuyo muna sa Tourism Office asin sa local health office nganing aramon kun delicado o safety an lugar ano man posibleng mangyari, sabi pa.
An pagsunko kan rinibong mga deboto ni Ina saindang nang debosyon dawa anong mangyari.
Sinabi pa ni Santos an abiso kan DOH nationwide alagad bako man gabos na lugar na pigdadayu nin mga nin turista apektado na kan pigdeclarang na may epidemiya sa dengue.
Si DOT Regional Director Benjamin Santiago nagpaluwas kan nakaaging semana nin travel advisory kasunod kan declarasyon kan DOH na nationwide huli kan padagos na paglangkaw nin caso na dara kan mosquito-borne disease.
Nangapudan an DOT sa mga turista na temporayo munang dai magbisita sa mga lugar na pigdeclara kan ahencia bilang Hot Spot nganing makaibitaran sa ano man na helang.
Sa record kan DOH Bicol puon kan Enero hasta Agosto ngonian na taon maabot na sa 4,500 an casong dengue asin 40 binawian nin buhay na halangkaw nin 158 por ciento kumpara sa kaparejong peryodo kan nagtalikod na taon na 1,653 caso na may 18 binawian nin buhay.