“Assignment”

September 5, 2019

 

Kan magbukas an Saint Joseph School sa Naga na pribadong eskwelahan kan mga Catolikong Tsino sa Camarines Sur, bako lang mga aki kan mga negosyanteng Intsik kundi dakol na mga aki nin Pilipino an nag-enroll sa nasambit na eskwelahan.    


Si mga pamilya na dating nagpapa-ereskwela sa Ateneo,  Parochial (Naga Parochial School) saka “Colegio” (Universidad de Sta. Isabel) nagbaralyo sa Saint Joseph maski ngani bistado ining para sa mga Tsino. An rason, gusto nindang makanood nin linguaheng Intsik an mga aki tanganing kun nagbabakal sa tindahan magamit ninda an tataramon sa pagtawad tanganing maka-aprobitsar nin baratong  presyo kan barakalon saka gusto nindang maintindihan an orolay na dai ninda nasasabotan, lalo na an surat na kinalingking.


Poon kadto mga dekada 60 nagkusog an impluwensya kan Chinese Community sa Naga asin sa provincia. Maski an negosyo kan mga Tsino nagkusog.


Mantang an mga Intsik nag-apil na sa kultura asin relihiyon kan mga Pinoy, an mga Pilipino man nakanood na kan ugaling Intsik maging sa negosyo, sa pagtrabaho, sa higos, asin sa pagtipid.


Pero an bantog bareta na dahilan na naging popular an Saint Joseph School iyo an pig-aapod na “study habits “na pigtutukdo kan eskwelahan sa mga estudyante poon elementary sagkod high school.


Talagang marhay mag-aradal kan saindang mga leksyon an mga taga Saint Joseph. May naimbento pang dagdag na ugali: an tutoryal o an pagtukdo nin mga espesyal na maestro/maestra sa luwas kan classroom sagkod sa harong pakatapos kan klase sa maghapon asin na sa eskwelahan. Magpoon kadto nagparadarakol an eskwela kan Saint Joseph an mga graduado nagsikat sa colegio sa ibang eskwelahan sagkod sa Metro Manila. May nag-tatopnatcher sa mga examin arog kan bar exams  asin eksamin para sa mga doctor asin accountants.  Alagad bako man gabos an nagkuyog sa siring na direksyon maski an mga aki kan mga Intsik asin may mga mestisong Intsik.


Saro dyan si Monlee, naguin halagkaw na opisyal sa banko duman sa Manila, leader kan grupong “Pororopot” na bantugan kan dekada 60 asin 70, King of Comedy sa Ateneo, pamilya nin mga matataling aki lalo na sa mathematics pero habo niyang magpaklase sa Saint Joseph, imbes sa Parochial man guiraray. An saiyang rason  ta habo niyang marugado an mga aki sa sobrang pag-adal, gulping homework asin assignments. 


Sabi ni Monlee, debuhista kan pamusong comic strip na “Cesar Asar” sa Manila Bulletin, daing data man an sobrang adal, an mga aki dapat may panahon nin pagkawat asin mag-enjoy kan saindang pagka-aki ta dai na nungka yan mabalik.


An saro niyang aki na si Anabel Lee asensado na duman sa New York sa Amerika, si Christoper “Topel” Lee saro nang director kan ABS CBN sa Manila.


Kun iisipon nasa aki man yan an pagkanood sa laog kan eskwelahan, an disiplina sa pag-adal, katabang man guiraray an eskwelahan, estudyante, an maestro/maestra asin mga magurang.


An pagkawat o sports importante sa buhay nin sarong tao, dapat balansiyado an pag-adal sa laog kan classroom saka an pagkawat halimbawa nin basketball, volleyball, softball o golf. Sabi ngani ni Bong Sison, kampeon na amateur Golfer sa Pilipinas na aki kan may sadiri kan University of Nueva Caceres, an sports kaipuhan sa disiplina, ugali, dunong lalo na sa salud nin tao.


An kontrobersya ngonyan kun baga mapasar nin ley na ipagbabawal an pagdara nin homework sa harong dai dapat pagtawan nin seryosong atensiyon kan mga tao asin Kongreso.


Nagigiromduman ko kan high school, an mga eskwela sa Ateneo may lulutong libro, may bitbit pang magabat na mga notebooks, pag-abot sa eskwelahan makarawat pang basketball o baseball, ma-training sa elocution, masurat sa Blue and Gold,Maogmang Lugar,ma-artista sa entablado, ma-sakristan pa sa misa asin ma-drill sa PMT.Mabasa pa nin mga libro sa library.


Pagpuli sa harong masapna pa, mahugas nin plato o ma-aling sa tugang na ngohud, ma-adal pa asin magibo nin mga assignments. Sadiring kayod mayong tutor, naghahapot-hapot lang sa mga magurang asin mga tugang.


Marhay baga an resulta. Nagproducer nin Gregorio Castillo, Joaquin Bernas, Angel Santo Tomas, Raul Roco, Ronald Remy, Francis Gachitorina, Rufo Tuy Jr, Luis Villafuerte, James Jacob, Jess Robredo, Gabby Bordado asin kadakol-dakol pang iba na nag-arasenso bako lang digdi sa Bikol kundi sa Manila, Mindanao asin abroad.


Pabayaan ta lang an aki na magdiskarte tanganing makatapos kan saindang pag-adal. An gobyerno matao na sanang suporta asin guiya na an mga reglamentos asin leyes kan nasyon masunod asin sinda maguin marhay na ciudadano.


Sa laog kan eskwelahan an may poder an eskwelahan, pag-abot sa harong sa mga magurang naman.
*****
Mag-antabay sa programang “INI AN TOTOO” kada Sabadong alas 9:30 nin aga (oras sa Pilipinas) sa OK Bangon FM, 97.5 KHZ/PBN TV 5, Caceres cable,Sky cable asin facebook live streaming worldwide. Program hosts: Ervin Borja and Ernie Verdadero.


May mga espesyal na bisita.  


Diyos mabalos.   


For comments/ reactions, please contact Cp nos. 09296281848/09613638409 or verdaderoernesto@yahoo.com/fb: Ernie Verdadero
Website: www.bicolmail.net
 

Share on Facebook
Share on Twitter
Please reload