Isusuplay na P4.3-M na droga sa Peñafrancia fiesta, dakop kan PNP

September 5, 2019

Amay nadakop kan Regional Division 5 Special Operation  Unit kan Bicol  PNP asin Naga City Police Office (NCPO) an magkasaruan na planong magbariwas nin P4.3 milyon na cantidad nin droga ngonian na panahon nin Peñafrancia fiesta.


Si City Director Police Col. Felix Servita Jr. nagpahayag sa ginibong press conference sa NCPO na haloy nang nasa watch list an saindang nadakop na magkasaruan na sinda Yuner Inda y Tanbao, 33 años residente kan Diliman, Quezon asin an saiyang kasaruan na si Jamaica Dela Cruz, 23 años residente kan San Francisco, Magarao, Camarines Sur asin sarong estudiante.


Sa pinagsarong anti drug buy-bust operation na pinangenotan ninda Police Major Alden Orequeta pamayo kan special operation unit asin Police Major Butch Moraleda kan NCPO drug enforcement unit asin Police Major Ireneo Andales kan Police Station 2 kan Ciudad nin Naga sa kaibanan an PDEA saindang nadakop sinda Inda asin Dela Cruz sa laog kan saindang kotse mga alas 7:30 nin banggui kan Martes, Septiembre 3 harani sa Civic Center sakop kan barangay Balatas.


Nasiod sinda sa paagi kan saindang kaibanan na nagpamalo na mabakal nin shabu sa cantidad na P50 mil.
Dagos nang pinalibotan kan elementos kan awtoridad sagcod na pigramalan an mga suspechado na nakumfiscar an maabot sa 700 gramos nin shabu na may cantidad nin P4.3 milyon sa street value.


Sinda nag-aatubang na nin caso sa corte sa pagbalga kan RA 9165 na mas bestado sa Comprehensive Dangerous Drug Act of 2002.


Pigbuyagyag pa ni Servita si Inda bako lang nagsusuplay nin droga sa Ciudad nin Naga envez sa Camarines Sur, Camarines Norte, Albay asin Sorsogon.


Sa Sangguniang Panlungsod kan Ciudad nin Naga si Consejal Vidal Castillo nagpahayag na dapat lang tawan nin komendasyon an envueltong opisyal sa pagkakadakop kan drug pushers.


Nakatalaan siyang magpadreno nin resolucion sa masunod na sesyon regular para sa pagtao nin onra sa dakulang acomplisimiento kan NCPO asin Special Unit kan Bicol PNP.  (dpa)
 

Share on Facebook
Share on Twitter
Please reload