RTL kinundenar kan mga paraoma

September 5, 2019

Kinundenar kan sektor nin mga paraoma sa Camarines Sur  asin sa iba pang provincia sa Bicol an Rice Tarrification Law (RTL), dai man nakatabang sa pobreng paraoma envez iyo an nagpapasakit huli kan padagos na pagbagsak kan presyo kan paroy.


Hahagadon ninda sa congreso na ibasura na an ley huli ta pagabat sana sa pagbuhay kan paraoma.


Naglansar nin mga protesta sa Camarines Sur, Camarines Norte asin Albay an manlaen-laen na organisasyon nin paraoma sa atubangan kan opisina rehiyonal kan Departamento de Agricultura, National Food Authority asin Philippine Coconut Authority sa isyu sa pagbagsak man kan presyo kan kopras.
Igwa na sindang andam na position paper  sa tolong ahencia sa pagcontra asin pagkundenar sa RTL asin pagbaba kan presyo kan kopras.


Si Tess Cielo, lider kan Amihan Kababaihan Magsasaka (AKM) sa Camarines Sur nagsabi dai man narealisar an pigsasabi sa RTL na magbababa an presyo kan mga commercial rice sa mercado mientras tinawan buelo an rice traders sa pag-angkat nin bagas sa ibang nasyon asin hinali na sa NFA.


Sa ngonian an commercial rice nagdadalagan sa presyong P45 hasta P50, nag-epekto na an RTL kan Abril 2019 alagad dai man namate kan consumedores an pagbaba kan presyo sa mga mercado.


Sinabi kan AKM putik man na an RTL iyo an makontrol kan presyo kan bagas particularmente sa satong nasyon envez an nakikinabang si dati nang milyonaryong rice traders.


Mayo kaming naheheling na suporta sa gobierno padagos nalulugi huli sa baratong presyo kan paroy sa mga kumprada na nagdadalagan sa P11 hasta P13.


Mas lalong ginagadan an mga paraoma sa mayong kontrol sa pagbaba kan presyo kan paroy asin mayong nangyari na mababa an presyo kan commercial rice, sabi pa ni Cielo.


Nagsimbag man an DA na igwang alokasyon na P10 bilyon  an gobierno na tabang sa mga paraoma para sa annual rice comprehensive enhancement fund na yaon sa poder kan ahencia an pagpaluwas nin  fondo.
An P5 bilyon para sa Philmech na gagamiton para sa production of postharvest machineries and small irrigation projects, mientras na P3 bilyon para sa Philrice, P1 bilyon itatao sa DBP sa east access loan asin P1 bilyon para sa iba pang actividades na an setenta por ciento kaini sa TESDA.     (DPA)

Share on Facebook
Share on Twitter
Please reload