SA PEÑAFRANCIA FIESTA: Pagsabotaje kan manga terorista binabantayan

September 5, 2019

An paghasok nin kariribokan asin pagsabotaje kan mga terorista sa panahon kan celebrasyon kan Peñafrancia fiesta saro sa mayor na tinututokan kan mga miembros kan awtoridad nin huli ta rinibong mga devotos ni Ina an masungko sa Ciudad nin Naga.

 

Kaayon sa dapat subaybayan iyo an grupo nin mga tawo na envuelto sa pagconducir nin mga terror attacks siring kan bomb threats nganing maghasok nin katakutan sa mga bisita asin devotos na ginigibo kan rebeldeng grupo.

 

Afuera kan ibang grupo nin mga kriminal na envuelto sa pickpocketing, salisi asin mga insidente nin harabonan maging kan iba pang street crimes. Ini an mga pahayag ni Police Major Josel Zape kan Naga City Police Office (NCPO) mientras na amay pa an panahon saindang pinapakusog an pagmantenir kan paz y orden.

 

Si City Director P/Col. Felix Servita kan NCPO nagsabi na saro sa hahagadon ninda sa National Telecommunication na gadanon muna an signal kan mga telephone companies na saro sa ginagamit kan mga terorista sa pagsabwag nin kariribukan.

 

An pag-off kan signal kan mga telcos dati nang pig-iimplementar kan NTC sa kahagadan kan NCPO na suportado man kan Joint Operation Center kan City Hall.

 

Alagad limitado sana sa panahon kan mga mayor na actividades arog kan traslacion asin fluvial procession ki Nuestra Señora de Peñafrancia asin sa military street parade competition.

 

Sinabi pa ni Servita na mapadara nin augmentation force an Bicol PNP sa pamamayo ni Brig General Arnel Escobal na compuesto nin 1,500 na kapupulisan.

 

Nagbilog na nin PNP Regional Task Force nganing maseguro an higot na seguridad para maulang an ano man na mararaot na elemento na planong magparibok kan relihiyosong celebrasyon.

 

Kan nakaaging Septiembre 2, nagkaigwa na nin miting an mga miembros kan Inter-Agency Task Force na magtatarabangan nganing magkaigwa nin matuninong asin solemne an kafiestahan ni Nuestra Señora de Peñafrancia ngonian na bulan.

 

Si Rene Gumba jefe kan PSO asin JOC manager nagsabi na an misyon kan Task Force na pig-ngaranan na ngonian bilang Multi-Agency Coordinating Group (MAC-G) na gigibohon kan grupo kan MAC-G an saindang espuersos arog kan manpower nganing masunod an pighaman na mga plano asin programa.

Share on Facebook
Share on Twitter
Please reload