Alcalde Severo pabor sa pagbanga

September 12, 2019

Calabanga, Camarines Sur. Mayo kaming pag-ulay kan Sangguniang Bayan nganing magpasar nin resolucion para sa ‘’reapportion’’ o pagbanga kan ika-tolong distrito kan Camarines Sur alagad pabor ako digdi.

 

 

Ini an piglinaw ni Alcalde Eduardo Severo alagad hinahagad ni Consejal Levy Sta. Ana na iyo an padreno kan resolucion na mag-ulay sinda asin iyo na palang ini an mawot ipaaram sa saiya.


Sa resolucion an bagong legislative district kinababalihan kan Ciudad nin Naga, Pili asin Ocampo asin an distrito na compuesto nin mga banwaan kan Calabanga, Bombon, Magarao, Canaman asin Camaligan.


Nagtutubod an SB na dai sindang problema sa isyu sa pigmamando kan Local Government Code na  dapat igwang 250 populasyon an rekisitos sa pag-crear nin bagong legislative district huli ta bako man sindang ciudad. Pig-ehemplo ninda si caso sa pagcrear nin bagong legislative district kan dating premir distrito kan Camarines Sur na nabanga sa duwang distrito kan panahon ni dating Diputado Dato Arroyo.


Kan makaulay kan Bicol Mail an jefe ejecutivo kan Martes, Septiembre 10 sinabi kaini na dai niya pa narerecibe an kopya kan resolucion asin nagseguro na saiyang aaprobaran nin huli ta sarong ventaje kun marealisar an propuesto ley na isusumiter pa sa congreso.


Kabali sa saiyang pigtawan nin punto, enot na an lalakaw-lakawan kan congresista dikit nalang na mga banwaan na mas matatawan nin panahon si mga tawo sa ngaran na mga proyecto, parejo man an magiging alokasyon na itatao sa lambang distrito na dakulang ventaje, sabi pa ni Severo.


Yaon man giraray sa kamot kan congreso na iyo igwang dapat na mga babasehan nganing saindang aprobaran para maging ley.


Piglinaw kan jefe ejecutivo na dai man siya nagsasabi na mayong mga proyecto si Bordado sa saindang banwaan alagad hagad niya na kun may dadarahon na proyecto sa infrastraktura paagihon sa consultasyon.
Saro sa saiyang pangiturogan na marealisar na an flood control project sa barangay Balongay, Duminurog, asin Sabang. Sa ngonian an proyecto hinahagad na niya nin tabang ki Usec Marvel Clavecilla.


Pigtawan nin considerasyon ni Consejal Sta Ana bilang padreno kan resolucion dakula nang marhay an presenting 3rd congressional district na dawa gurano  kahigos kan sarong diputado igwa na siyang limitasyon huli ta base sa pinakahuring 2015 census kan Phililippine Statistic Authority (PSA) igwa nang labi sa 500 mil katawo.  Dinagdag pa na kun tama lang si tawo sa sarong distrito mas matatawan nin atensyon kan representante kan distrito asin dakula an madadarang proyecto.


Sinabi  man ni Consejal Danilo Gonzales na an saindang  resolucion bako sa political accommodation envez nganing magkaigwa nin dugang na alokasyon sa bagong distrito na dakulang ventaje para sa dugang na mga proyecto.

Share on Facebook
Share on Twitter
Please reload